Sirag 40 - Papiamentu Bible with DC 2013(PBDC13)

Mizeria di hende

1For di su nasementu hende ta destiná pa pasa den hopi kos,

un peso pisá ta riba yunan di Adam,

fo'i ora nan a sali fo'i skochi di nan mama

te ora nan bolbe bèk serka e mama di tur kos:

2preokupashon, kurason ku miedu

i espera yen di angustia riba morto.

3For di esun ku ta sinta altu riba trono

te esun ku ta sinta den stòf i shinishi,

4for di esun ku ta bistí na püs i tin korona riba su kabes

te esun na paña di rou:

semper bai tin ira, envidia, konfushon, intrankilidat,

miedu di morto, odio i pleitu.

5Asta anochi ora e bai drumi pa sosegá,

soñamentu ta perturbá su mente.

6Kasi e no ta sosegá,

i te na ora e pega soño, ta manera e mente sí ta lantá.

Pesadianan ta pon'é bira intrankil,

e ta mira e mes ta hui pa un enemigu.

7Ora e ta mas den pèrtá e ta spièrta di gòlpi,

tolondrá di e sustu sin motibu.

8Esaki ta konta pa tur ser bibu, hende i bestia,

pero pa pekadónan e ta konta shete be mas tantu:

9pèst, matamentu, pleitu, guera,

desaster, mizeria di hamber, destrukshon i epidemia.

10Tur e kosnan akí ta bini pa kastigá pekadó;

ta pa nan motibu tambe a bini diluvio.

11Tur loke bini for di tera, ta bai tera bèk,

meskos ku tur awa ta bai laman bèk.Lei di kastigu

12Tur soborno i inhustisia lo disparsé,

pero fieldat lo keda pa semper.

13Biennan hañá na manera inhustu lo para seka manera un roi

òf pasa bai manera zonido di bos ora tin mal tempu.

14Esun ku duna ku man generoso lo haña alegria,

pero mal hende lo kaba na nada.

15Desendientenan di mal hende lo no prosperá,

pasobra nan ta tira rais den baranka duru;

16nan ta manera yerba kantu di roi,

ku ta seka einan promé ku tur otro mata.

17Pero un obra di karidat ta manera un hardin fértil,

un limosna semper bo ta keda kòrda.

Gosonan di bida humano

18Biba di bo mes propiedat òf trabou ta dushi,

pero mas mihó ainda ta haña un tesoro.

19Yu i un siudat ta konsolidá nòmber di hende,

pero mas mihó ainda ta un esposa ireprochabel.

20Biña ku muzik ta hasi kurason kontentu,

pero mas mihó ainda ta amor pa sabiduria.

21Flùit i arpa ta saka muzik agradabel,

pero mas mihó ainda ta un stèm agradabel.

22Elegansia i bunitesa ta un enkanto pa bista di hende,

pero mas mihó ainda ta yerba bèrdè den kunuku.

23Yega serka un amigu òf kompañero ta un momento mashá bunita,

pero mas mihó ainda ta ora esposo yega serka esposa.

24Ruman hòmber i ayudantenan ta yuda bo den tempu di emergensia,

pero mas mihó ainda ta obra di karidat.

25Oro i plata ta duna pia sosten,

pero mas mihó ainda ta bon konseho.

26Propiedat i forsa ta duna bo konfiansa,

pero mas mihó ainda ta rèspèt pa Señor.

Kaminda tin rèspèt pa Señor, no ta falta nada,

kaminda tin rèspèt pa Señor, no tin mester di buska yudansa mas.

27Rèspèt pa Señor ta manera un hòfi delisioso,

no por a deseá mas mihó lugá di skonde solo.

Parasitismo

28Mi yu, no biba un bida di parasit,

mihó muri ku biba riba kustia di hende.

29Hende ku ta lur mesa di otro hende

no tin un bida ku ta meresé e nòmber ei.

Biba riba kustia di hende ta kos di kara seku;

hende sensato i sivilisá no ta hasi kos asina.

30Hende sinbèrgwensa ta haña pan di limosna dushi,

pero den su stoma lo e mester kima manera kandela.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help