Salmo 138 - Papiamentu Bible with DC 2013(PBDC13)

SALMO 138Grandi ta SEÑOR su mahestat i fieldatDi David.

1Mi ke alabá Bo di henter mi kurason,

kanta bo alabansa dilanti di e diosnan.

2Mi ke bùig pa bo tèmpel santu,

mi ke duna grasia na bo nòmber

pa motibu di bo amor i fieldat,

pasobra Bo a laga bo promesa

surpasá bo renombre di ántes.

3Ora m'a yama Bo Bo a skucha,

B'a duna mi ánimo i forsa.

4Tur rei di mundu, SEÑOR, lo alabá Bo

dia nan tende bo Palabra

5i lo kanta di SEÑOR su desishonnan:

‘Grandi ta SEÑOR su mahestat!’

6Sí, maske SEÑOR ta elevá,

E ta mira un hende humilde

i djaleu ta vigilá un orguyoso.

7Kada be ku mi haña mi den peliger

Bo ta mantené mi na bida;

Bo ta hisa man kontra furor di enemigu,

bo man drechi ta duna mi salbashon.

8SEÑOR lo kumpli ku tur esei pa mi:

SEÑOR, bo fiel amor ta eterno!

No lubidá e obra di bo man.