Sirag 4 - Papiamentu Bible with DC 2013(PBDC13)

1Mi yu, no kita for di un pober

loke e mester pa e biba,

ni laga wowo yen di gana warda.

2No hasi hende ku tin hamber tristu,

ni amargá bida di hende den nesesidat.

3No hasi un kurason amargá, desesperá,

ni laga esun ku a pidi algu, warda.

4No rechasá hende ku ta den pèrtá,

ni bira lomba pa hende pober.

5No kita kara ora un pober pidi bo algu

ni dun'é motibu pa maldishoná bo.

6Pasobra si e maldishoná bo den su amargura

su Kreador lo skucha su petishon.

7Hasi bo mes stimá den komunidat

i baha kabes pa hende ku puesto altu.

8Pero skucha prinsipalmente hende pober

i atend'é na un manera suave i kariñoso.

9Libra esun oprimí for di man di su opresor

i no tene miedu ora bo sali na defensa di hustisia.

10Sea pa wérfanonan manera un tata

i pa nan mama manera e esposo ku el a pèrdè;

e ora ei abo lo ta manera un yu di Altísimo

i lo E stima bo mas ku bo mes mama a stima bo.

OUTENTISIDATSabiduria komo bon edukadó

11Sabiduria ta hasi su yunan bira hende respetá

i ta perkurá pa esnan ku ta busk'é.

12Es ku stim'é ta stima bida mes

i es ku busk'é for di trempan lo ta yen di alegria.

13Es ku haña sabiduria ta gana gloria;

Señor lo bendishon'é, unda ku e bai.

14Sirbidónan di sabiduria ta sirbidó di Dios Santu;

esnan ku stima sabiduria, Señor ta stima nan.

15Es ku skucha sabiduria ta fiha lei pa nashonnan,

es ku tene su mes n'e por biba den seguridat.

16Es ku tin konfiansa den sabiduria, lo hered'é

i su desendientenan lo keda kuné pa semper.

17Na prinsipio sabiduria ta trata hende straño,

e ta yen'é ku miedu i temor,

torment'é ku su eksigensianan,

te ora enberdat e ta konfia e hende;

ma sabiduria ta sigui purb'é ku su sistema di edukashon.

18Despues di esei lo e aserk'é direktamente,

hasié kontentu i revel'é su sekretonan.

19Ora hende desviá, e ta lag'é pa su kuenta

i lag'é kai den pèrdishon.

Sea bo mes

20Sea konsiente di e tempu ku bo ta biba aden,

keda leu for di maldat,

i no sinti bèrgwensa di ta bo mes.

21Pasobra tin bèrgwensa ku ta kondusí na piká,

i tin bèrgwensa ku ta produsí rèspèt i bon nòmber.

22No aktua kontra bo konsenshi pa miedu di hende,

ni laga bèrgwensa falsu pone bo kai.

23No laga di papia ora e momento pidi esei,

ni skonde bo sabiduria.

24Pasobra ta for di loke bo bisa òf kontestá,

por mira si bo tin sabiduria di bèrdè,

i ku bo sa kiko bo ta papia.

25-26No lanta kontra bèrdat

ni lucha kontra koriente.

No sinti bèrgwensa pa rekonosé bo fayonan;

sinti bèrgwensa di bo ignoransia.

27No sea katibu di un hende ignorante

ni hasi trastu ku un mandatario.

28Lucha pa bèrdat te na morto,

i Dios lo lucha pa bo.

29No papia yen di buya,

tanten bo ta kobarde i manera hende sin wesu di lomba.

30No hunga ròl di leon wapu na kas,

tanten bo ta tembla manera bara bèrdè dilant'i esnan bou di bo.

31No habri man pa tuma

ni ten'é será ora di duna.