Sirag 38 - Papiamentu Bible with DC 2013(PBDC13)

Dòkter

1Respetá un dòkter pa su servisio,

pasobra e tambe ta parti di kreashon.

2Ta debí na Dios ku e por kura hende,

na korte e ta haña regalo.

3Konosementu di un dòkter ta dun'é mas prestigio

i e ta haña akohida serka hende importante.

4Ta Dios ta produsí remedi for di tera,

un hende sensato lo no despresiá nan.

5Un pida palu no a hasi di awa marga, awa di bebe,

p'asina tur hende konosé Dios su poder?

6E mes a duna hende konosementu

pa nan dun'É honor pa su obranan maravioso.

7Ku e remedinan ei dòkter ta kita doló,

ku nan tambe e botikario ta traha salfi.

8Dios su obra di kreashon ta sigui ketu bai

i di djE kura ta bini pa mundu.

9Mi yu, ora bo ta malu, hasi tur kos:

roga Dios, pasobra t'E ta kura;

10rechasá maldat, aktua honestamente

i purifiká bo kurason di tur piká;

11hasi un ofrenda di sensia i un di hariña fini

i un ofrenda generoso segun bo forsa;

12pero laga e dòkter tambe kumpli ku su mes tarea,

pasobra e tambe ta parti di kreashon,

lag'é keda na bo lado, pasobra bo tin mester di dje tambe.

13Tin momento ku tòg e bon resultado ta den nan man,

14pasobra nan tambe ta resa pidi Señor,

pa nan por diagnostiká bon

i apliká remedinan efikas.

15Mara e hende ku ta peka kontra su Kreador

por kai den man di dòkter.

Tene rou òf nò

16Mi yu, yora un defuntu,

grita yora pa bo pièrdè grandi,

drecha e morto segun su rango

i no keda sin der'é.

17Tene un seremonia solèm manera e defuntu meresé

i yora amargamente bo doló pisá

dos tres dia pa evitá papiamentu

i konformá bo ku bo tristesa.

18Pasobra tristesa ta mata hende,

i doló di kurason ta afektá bo salú.

19(Dera bo fèrdrit pareu ku e morto,

un bida di sufrimentu ta insoportabel.)

20No laga fèrdrit dominá bo kurason,

purba lubidá, kòrda ku bo fin tambe ta yega.

21Kòrda ku bo no por lag'é biba atrobe,

bo no por yud'é mas, pero bo por perhudiká bo mes.

22Kòrda ku su destino lo ta di bo tambe,

awe t'e, mañan t'abo.

23Ora un defuntu bai sosegá, laga su rekuerdo tambe sosegá

i konformá bo, awor ku el a bai.

E dòktor di lei ideal

24Sabiduria di un dòktor di lei

ta dependé di e oportunidat ku e tin pa studia

i ta solamente hende ku no mester traha trabou pisá

por dediká su mes na sabiduria.

25Kon un hende por dediká su mes na sabiduria

si e ta manehá su plug i orguyoso manera un rei

ta guia su buenan i ta okupá ku nan

i ta papia henter ora di bisé?

26Ku alma i kurpa e ta keda koba roi

i ta sakrifiká su soño

pa duna su bisénan kuminda.

27Asina ta bai ku tur artesano,

ku ta okupá di dia i anochi.

Asina ta bai ku esnan ku ta graba seyo:

semper bai nan ta kòrta figura nobo.

Ku alma i kurpa e ta traha

pa hasi e imágen semehante na esun original

i ta sakrifiká su soño

pa por kaba su trabou.

28Asina ta bai ku e smet, sintá na su ánbelt,

yen di atenshon pa e heru ku e ta traha kuné;

kayente di kandela ta pone su karni dirti

i e ta púluwe den e kalor di su fòrnu;

zonido di martin ta zona ketu bai den su orea

i su bista ta keda fihá riba e modelo ku e ta kopia.

Ku alma i kurpa e ta traha pa kaba su obranan

i ta sakrifiká su soño

pa por entregá algu perfekto.

29Asina ta bai ku e trahadó di pòch'i klei

ku ta drei e wil ku su pia;

semper bai e ta preokupá pa su obra

i ku lo e alkansá e kantidat fihá.

30Ku su pianan e ta hasi e klei kla pa mansa

i ku su mannan e ta dun'é forma.

Ku alma i kurpa e ta traha

pa hasié di rikla fini

i ta sakrifiká su soño

pa limpia su fòrnu.

31Nan tur ta konfia riba nan mannan

i kada un ta un eksperto den su fishi.

32Sin nan no por biba den un siudat

i unda ku nan bai biba, di hamber nan lo no muri.

33Pero no ta pidi nan den konseho di pueblo

ni nan no ta sali dilanti den komunidat.

Nan no ta kai sinta riba stul di hues

ni tin idea kiko ta desishon hurídiko.

34Nan no ta duna muestra di edukashon ni di por dirigí

ni lo no topa nan entre gobernantenan.

Nan lo sigui traha riba loke Dios a krea

i asina kontribuí na su kreashon eterno.

Tambe nan ta resa pa ehersé nan fishi bon.