2 Krónikanan 25 - Papiamentu Bible with DC 2013(PBDC13)

Reinado di Amasías(2 Reinan 14:1-22)

1Amasías tabatin 25 aña dia el a bira rei. El a goberná durante 29 aña na Herusalèm. Su mama tabata Yehoadan di Herusalèm.

2Amasías a hasi loke ta bon den bista di SEÑOR, pero no di henter su kurason.

3Asina Amasías tabata sintié sigur di su reino, el a kaba ku tur e funshonarionan ku a mata su tata.

4Pero e no a mata nan yunan. El a aten'é na loke ta skibí den buki di lei di Moises, kaminda SEÑOR a ordená: ‘No mata mayornan pa piká di nan yunan, ni mata yunan pa piká di nan mayornan. Solamente pa su mes piká por mata un hende.’

5Amasías a laga yama tur hòmber di Huda pa drenta servisio militar. El a repartí e hudeonan i benhaminitanan segun nan famia i a nombra algun òfisir riba mil i riba shen sòldá. Despues di a konta tur di binti aña òf mas, a resultá ku e tabatin un ehérsito di 300.000 sòldá itrein ku por a usa lansa i eskudo.

6Ademas, pa 3000 kilo di plata el a tuma 100.000 sòldá itrein di Israel den servisio militar.

7Pero un hòmber di Dios a bin bis'é: ‘Mahestat, no laga ehérsito di Israel bai ku bo, pasobra SEÑOR no ta ku Israel, ku tur e efraimitanan ei.

8Bai antó numa i mustra kon fuerte bo ta den bataya, e ora ei Dios lo laga bo pèrdè kontra bo enemigu, pasobra t'E so por duna viktoria òf derota.’

9Amasías a kontestá e hòmber di Dios: ‘Kiko ta para di e 3000 kilo di plata ku mi a paga pa e ehérsito israelita?’ E hòmber di Dios a rospond'é: ‘SEÑOR por duna bo muchu mas ku esei!’

10E ora ei Amasías a manda e ehérsito efraimita bai kas bèk numa. Nan a rabia mashá ku Huda i bon rabiá nan a bai kas bèk.

11Amasías a tuma un kurashi i a hiba su ehérsito den Vaye di Salu. Ei el a derotá 10.000 edomita.

12Tambe hudeonan a kohe 10.000 edomita prezu, nan a hiba nan riba baranka i a benta nan abou laga nan spat for di otro.

13Pero mientrastantu e sòldánan ku Amasías a manda kas bèk a ataká siudatnan di Huda entre Samaria i Bet-Horon. Nan a mata 3000 hende i a bai ku un botin grandi.

14Ora Amasías tabata bai kas bèk despues di su viktoria riba e edomitanan, el a bai ku nan imágennan di dios falsu. El a instalá nan i a bùig den adorashon pa nan i kima sensia pa nan.

15P'esei SEÑOR a rabia ku Amasías; El a manda un profeta serka dje pa puntr'é: ‘Di kon bo ta buska yudansa serka e diosnan akí, si nan no por a yuda ni nan mes pueblo kontra bo?’

16Promé ku el a kaba di papia, Amasías a interumpié bisando: ‘Ken a nombra bo komo mi konsehero? Sera bo boka pa nan no mata bo!’ E profeta a keda ketu pero promé el a bisa: ‘Awor mi sa ku SEÑOR tin plan di destruí bo, pasobra bo a hasi asin'akí i bo no ker a skucha mi konseho.’

17Despues ku Amasías a konsultá ku su konseheronan, el a manda e siguiente rospondi pa Yoash, rei di Israel, yu di Yoahaz i ñetu di Yehu: ‘Bon, ban midi forsa!’

18Pero Yoash, rei di Israel, a manda e siguiente kontesta pa Amasías, rei di Huda: ‘Un dia, riba e serunan di Libanon, un mata di sumpiña a manda bisa un palu di seder: “Laga bo yu muhé kasa ku mi yu hòmber.” Pero animalnan feros a pasa i trapa e mata di sumpiña mata.

19Amasías, bo ta pensa: “Mi a derota Edom!” E viktoria a susha bo kabes i bo ke buska ainda mas honor. Keda kas. Pakiko provoká desgrasia ku lo kousa bo kaida i kaida di Huda tambe?’

20Pero Amasías no ker a tende, esei tabata obra di SEÑOR; E ker a entregá Amasías i e hudeonan den man di Yoash, pasobra a adorá e diosnan falsu di Edom.

21E ora ei Yoash, rei di Israel, a sali i na Bet-Shèmèsh den Huda, Yoash i Amasías a midi forsa.

22Israel a derotá Huda i e hendenan di Huda a hui bai kas.

23Rei Yoash di Israel a kohe Amasías, rei di Huda, ku tabata yu di Yoash i ñetu di Ahazías, prezu na Bet-Shèmèsh. Yoash a bai Herusalèm i laga basha 200 meter di e muraya di siudat abou, for di Porta di Efraim te na Porta di Skina.

24Ademas el a bai ku tur oro i plata i tur kos di uso ku tabatin den tèmpel di SEÑOR bou di supervishon di e desendientenan di Obed-Edom. Tambe el a bai ku e tesoronan di palasio real i despues di a kohe algun hende komo rehen, el a bolbe Samaria.

25Rei Amasías di Huda, yu di Yoash, a biba diessinku aña mas despues di morto di rei Yoash di Israel.

26Sobrá historia di Amasías for di antaño te mas resien ta skibí den buki di e reinan di Huda i di Israel.

27For di tempu el a bira lomba pa SEÑOR, nan a traha un kòmplòt kontra dje na Herusalèm. El a hui bai Lakish, pero nan a laga persiguié te aya i mat'é.

28Riba un waha halá pa kabai a hib'é Herusalèm, kaminda a der'é serka su antepasadonan na Siudat di David.