1Dios, laga rei kompartí bo mes huisio,
e yu di reinan ei trese bo hustisia;
2lag'é guia bo pueblo ku hustisia
i parti derecho pa bo pobernan.
3E ora ei seru- i seritunan lo trese
pas i hustisia pa bo pueblo.
4L'e sali pa pobernan di pueblo,
l'e salba yunan di esnan ku tin mester
i lo kaba ku tur ku t'eksplotá nan.
5E keda biba tanten ku tin solo
i ku tin luna, un siglo tras di otro.
6L'e ta manera awa riba yerba,
un awa duru ku ta muha tera.
7Den su tempu hustisia lo bona,
pas profundo lo reina
te ora luna no t'ei mas.
8Lag'é manda di laman te laman,
fo'i Eufrat te na skinanan di mundu.
9Beduinonan lo bùig su dilanti,
su enemigunan lo kai boka abou.
10Reinan di Tarsis i di e islanan
lo trese regalo p'e;
reinan di Sheba i Seba
lo bini pa pag'é nan tributo.
11Mare tur rei por dun'é homenahe,
ohalá tur pueblo sirbié!
12Lo e yuda un pober ku ta pidi,
un mizerabel ku ta sin protekshon.
13L'e tin pena di humilde i pobernan,
l'e salba bida di hende den apuro.
14L'e libra nan di opreshon i violensia,
nan bida ta presioso den su bista.
15Biba rei! Nan dun'é oro di Sheba;
mare nan resa p'e tur ora
i dese'é tur kos bon tur dia bai.
16Ku tin maishi na granèl den pais,
pegá pegá te den kabes di serunan,
dunando fruta manera Libanon,
su tapushinan mes tantu ku yerba di kunuku.
17Mare su nòmber keda ei pa semper,
su nòmber dura mes largu ku solo;
ku hende us'é pa bendishon,
tur nashon yam'é fortuná!
18Alabá sea SEÑOR Dios, Dios di Israel,
kende a hasi milager. E so!
19Alabá sea pa semper su nòmber glorioso;
ku su fama yena henter mundu.
Amèn, sí, amèn!
20Fin di e orashonnan di David, yu di Ishai.
Who We AreWhat We EelieveWhat We Do
2025 by iamachristian.org,Inc All rights reserved.
