Numbernan 8 - Papiamentu Bible with DC 2013(PBDC13)

Instrukshon pa e kandelar

1SEÑOR a bisa Moises:

2‘Bisa Aaron pone e shete lampinan di tal manera riba e kandelar, ku e lus ta tira pa parti dilanti.’

3Aaron a sigui e òrdu ku SEÑOR a duna Moises.

4E kandelar tabata tur na un, trahá di oro batí; tantu e bara komo e adornonan den forma di blachi, segun e modelo ku SEÑOR a duna Moises.Konsagrashon di e levitanan

5SEÑOR a bisa Moises:

6‘Apartá e levitanan for di e otro israelitanan i purifiká nan.

7Purifiká nan di siguiente manera: sprengu nan ku awa di purifikashon, laga nan feita henter nan kurpa i laga nan laba nan pañanan. Asina nan kaba nan ta puru.

8Despues nan ta kohe un toro yòn i e ofrenda vegetal di hariña fini mesklá ku zeta ku ta pertenesé n'e, miéntras abo mes ta kohe un di dos toro pa e sakrifisio pa pordon di piká.

9Laga e levitanan bai tènt di enkuentro e ora ei i yama henter komunidat di Israel huntu.

10Despues ku e levitanan bin para Mi dilanti na e tènt di enkuentro, e israelitanan mester pone man riba kabes di e levitanan.

11Aaron ta ofresé nan na Mi ku e rito di presentashon na nòmber di e israelitanan, di manera ku nan por tene sirbishi den santuario.

12Despues e levitanan ta pone man riba kabes di e dos toronan. Ofresé esun toro na Mi komo sakrifisio pa pordon di piká i e otro komo sakrifisio di kandela pa asina drecha tur kos entre e levitanan i Ami.

13Kaba laga e levitanan bai para dilanti di Aaron ku su yunan i ofresé nan na Mi ku e rito di presentashon.

14Asina bo mester apartá e levitanan for di e otro israelitanan pa nan pertenesé na Mi.

15Despues ku bo purifiká e levitanan i ofresé nan na Mi ku e rito di presentashon, nan por bai tene sirbishi den tènt di enkuentro,

16pasobra nan ta kompletamente na Mi disposishon. Mi a apartá e levitanan for di e israelitanan komo remplasante di tur yu hòmber promé nasí;

17pasobra tur promé nasí ta pertenesé na Mi.Éksodo 13:2,11-16 Dia Mi a mata tur promé nasí na Egipto Mi a destiná nan pa Mi.

18Mi a apartá nan komo remplasante di tur promé nasí di Israel

19i a pone nan na disposishon di Aaron ku su yunan. Komo representante di e israelitanan nan mester tene sirbishi den tènt di enkuentro i drecha tur kos entre e israelitanan i SEÑOR; ya e israelitanan no tin nodi di aserká e santuario pa no resultá nan fatal.’

20Moises ku Aaron i henter komunidat di Israel a ehekutá loke SEÑOR a ordená Moises pa hasi ku e levitanan.

21E levitanan a purifiká nan mes i a laba nan pañanan. Aaron a ofresé nan na SEÑOR ku e rito di presentashon i a drecha tur kos entre nan i SEÑOR. Asina el a purifiká nan.

22Kaba e levitanan a bai tènt di enkuentro pa tene sirbishi bou di guia di Aaron ku su yunan. A hasi ku e levitanan manera SEÑOR a ordená Moises.

Periodo di sirbishi di e levitanan

23SEÑOR a bisa Moises:

24‘Lo siguiente ta konta pa e levitanan. Es ku tin bintisinku aña òf mas mester bin tene sirbishi den tènt di enkuentro.

25Es ku tin sinkuenta aña mester retirá. E no tin nodi di tene sirbishi mas.

26Wèl e mag yuda e otro levitanan den tènt di enkuentro ku nan tarea, ma obligashon e no tin mas. Organisá tenementu di sirbishi dor di e levitanan asin'ei.’