1Kanta di legria pa Dios, nos forsa,
kanta gloria di Dios di Yakob.
2Entoná un salmo riba tono di tambú,
di arpa melodioso i di lira.
3Toka kachu ora luna ta nobo,
ku luna yen, nos gran dia di fiesta.
4Pasobra asina ta lei pa Israel,
t'e mandamentu di Dios di Yakob.
5El a hasié un dekreto pa Jozef,
ora El a sali kontra tera di Egipto.
Mi a tende un stèm ku mi n' ta'ta konosé:
6‘Mi a baha e karga fo'i bo lomba.
Mi a libra bo mannan dje makutu pisá.
7Den bo ansha bo a grita i Mi a salba bo,
skondí den ronkamentu di bos M'a kontestá Bo,
na fuente di Meriba Mi a sa ken bo ta.
8Tende, mi pueblo, Mi ke avisá Bo,
mare bo skucha Mi, Israel!
9Boso no sirbi un Dios strañero,
no adorá un Dios di afó.
10Ami ta SEÑOR, bo Dios,
Esun ku a saka bo for di tera di Egipto;
habri bo boka i lo Mi yen'é.
11Pero mi pueblo no a skucha mi bos,
Israel no a tende di Mi.
12M'a laga nan pa nan kuenta pa nan sigui nan kièr,
pa nan sigui nan mes idea.
13Ai, mare mi pueblo a skucha Mi
i Israel por a sigui mi kamindanan!
14Lo M'a humiliá su enemigunan mesora
i hisa man kontra su opresornan.
15Nan ku ta odia SEÑOR lo a trastia kunÉ,
ma nan kastigu lo a dura pa semper.
16Ma mi pueblo lo M'a kria ku manteka di trigo
i yen'é ku stropi fo'i baranka.’
Who We AreWhat We EelieveWhat We Do
2025 by iamachristian.org,Inc All rights reserved.
