Sirag 44 - Papiamentu Bible with DC 2013(PBDC13)

ELOGIO DI ANTEPASADONAN

1Awor ban kanta gloria di e hòmbernan sélebre,

e nòmbernan grandi di historia di nos pueblo.

2Señor a hasi nan mashá famoso,

for di prinsipio nan tabata grandi.

3Reinan ku tabata dominá mundu,

hòmbernan konosí pa nan poder,

konseheronan ku hopi komprondementu,

proklamadónan di palabranan profétiko,

4lidernan di pueblo pa desishonnan huisioso,

ku bon idea kon instruí pueblo,

elokuente grásias na nan edukashon;

5nan tabata traha kantika

i skibi buki di poesia;

6hòmbernan riku ku a haña poder,

pasifikadónan na nan lugá di biba.

7Nan kontemporáneonan tabata honra nan tur

i ten 'i nan ten ta nan tabatin fama.

8Tin di nan ku a laga un nòmber atras

di manera ku ta gaba nan.

9Tin ku a kai kompletamente den olvido;

nan a disparsé komo si fuera nunka nan no a eksistí,

manera nunka nan no a nase

ni yunan no a keda atras na nan lugá.

10Ma nós grandinan sí nò, nan tabata hòmber fiel,

nunka no a lubidá nan echonan.

11Nan propiedat ta bai pa nan desendientenan,

nan herensia ta pasa pa yu di nan yunan.

12Grásias na nan, nan yunan a keda fiel na e Aliansa ku Dios

i e yunan di nan yunan a hasi meskos.

13Nan desendensia lo keda pa semper,

ni nan fama lo no bai pèrdí nunka.

14Nan kurpa ta sosegá na pas,

nan nòmber ta biba di generashon pa generashon.

15Asamblea lo sigui gaba nan sabiduria

i komunidat lo proklamá nan gloria.

Henok i Noe

16Henok tabatin un relashon íntimo ku Señor i Señor a tum'é;

su aktitut tabata un ehèmpel pa tur generashon.

17Noe tabata un hòmber hustu i ireprochabel.

Tempu di Dios su ira, t'e a bira un prinsipio nobo.

Danki n'e a keda algun hende riba mundu, tempu di diluvio.

18Ta kuné Señor a sera un aliansa eterno

pa no kaba ku tur kos ku tin bida

pa medio di diluvio atrobe.

Abraham, Isak i Yakob

19Abraham ta tata grandi di hopi nashon;

su fama tabata intachabel.

20El a kumpli ku lei di Altísimo,

a sera un aliansa kunÉ;

el a imprimí e aliansa ei den su mes karni

i el a keda fiel durante di prueba.

21P'esei Señor a primintí Abraham bou di huramentu

ku lo E bendishoná tur nashon na mundu

pa medio di su desendientenan,

ku lo E hasié numeroso manera stòf di mundu,

ku lo E alsa su desendientenan mes altu ku streanan

i duna nan un herensia di laman pa laman,

for di Riu Eufrat te na fin di mundu.

22El a primintí

i a dun'é e pais komo herensia;

Yakob a partié na pida pida

i dun'é na e diesdos tribunan.