Sabiduria 13 - Papiamentu Bible with DC 2013(PBDC13)

Elaborashon riba idolatriaKulto di streanan i otro kosnan kreá

1Tur esnan ku no ta rekonosé Dios ta hende sin sintí. Apesar di e bon ku nan mes ta konstatá nan no ta logra konosé ESUN — KU — TA. Nan ta studia su obranan, sin haña e outor.Salmo 92:5-6; Sirag 17:8-10; Romanonan 1:19-20

2Kandela, bientu òf airu lihé, signonan di Zodiak, awa brutu òf lusnan di shelu, t'eseinan ta nan diosnan ku ta goberná mundu.

3Enkantá pa nan splendor, nan ta tuma nan pa dios, sin kòrda, kuantu mas grandi nan Doño mester ta: Esun ku ta fuente di bunitesa i Kreador di tur kos.

4Si nan keda impreshoná pa nan forsa i poder, nan mester kòrda kuantu mas poder nan Kreador mester tin.

5Pasobra tur e grandesa i splendor ku Dios a krea ta duna nos algun idea di Esun ku a krea nan.

6‘Pero, no por tuma nan na malu; nan por ta dualu pero nan ta hasi tur esfuerso pa haña Dios.Echonan 17:27

7Nan ta keiru den mundu di Dios, ta eksplorá mundu i ta kere nan bista: Esta bunita mundu ta!’

8— Nò, un bia mas nò! No por pleita nan kaso saka nan liber!

9Pasobra si nan a logra haña sa tantu kos ku asta nan por a forma un idea di universo, pakiko ántes nan no a haña e Doño di tur esaki antó?

E dios di palu

10Sinembargo mester tene duele di esnan tambe ku ta pone nan speransa den kosnan morto i ta yama obra di man di hende nan dios: sea obranan artístiko di plata i oro den forma di bestia, òf piedranan sin balor, obra di antaño.Salmonan 115:4-8; 135:15-18; Isaías 40:18-20; 44:9-20; Yeremías 10:2-16; Barug 6:7-72

11Asina un eskultor di palu ta zag un palu adekuá, ku abilidat e ta kita tur kaska di e palu i ta traha ku mannan kapas un muebel útil pa kas, ku ta fasilitá bida.

12E pida pida palunan ku sobra e ta usa pa prepará su kuminda, i e ta kome su barika yen.

13I sobrá di e pida pida palunan, ku no ta sirbi pa nada mas, un pida palu korkobá yen di kròbòkròbò, e ta kohe tene, i kuminsá kòrta manera pa un pasatempu, den tur trankilidat e ta form'é segun imágen di hende

14òf segun semehansa di un òf otro bestia despresiabel. E ta hunt'é ku meni, fèrf e kueru kòrá püs i sera tur buraku den dje.

15E ta traha un lugá di keda ku ta adekuá p'e, pon'é kontra muraya i peg'é ku un klabu.

16E ta tuma medida di prekoushon antó pa e no kai, pasobra e sa ku e no por yuda su kurpa; ya ku e ta un imágen, e mester di yudansa.

17Pero ora e ke resa pa su propiedatnan, pa su matrimonio i su yunan, e no ta sinti bèrgwensa pa papia ku e kos sin bida ei: e ta invoká e kos sin forsa ei, pa salú,

18e kos morto ei, pa bida, e kos di mas sokete ei, pa yudansa, i e kos ei ku no por dal ún stap, pa un bon biahe,

19i pa éksito den trabou, den negoshi i den aktividatnan, e ta invoká un kos ku no tin nada di aktividat den dje.