1E hóben Samuel a sigui sirbi SEÑOR i Eli tabata gui'é. Den e tempu ei mashá poko be SEÑOR tabata duna hende un mensahe; no tabata sosodé hopi ku un hende tabata haña un vishon.
2Pero riba un dia Eli, kende su wowonan a bai asina atras ku e no por a mira bon mas, tabata drumí den su kamber.
3Samuel tabata drumí den santuario di SEÑOR, kaminda e arka di Dios tabata.
4Mainta trempan, ora ku ainda no a paga e lampi ku tabata sendé dilanti di SEÑOR, SEÑOR a yam'é: ‘Samuel.’ ‘Ata mi akí,’ el a kontestá.
5El a kore bai serka Eli i el a bis'é: ‘Ata mi akí. Pakiko bo a yama mi?’ ‘Mi no a yama bo,’ Eli a kontest'é. ‘Bai drumi atrobe.’ E ora ei Samuel a bolbe bai drumi.
6Pero SEÑOR a bolbe yam'é: ‘Samuel.’ Samuel a lanta bai serka Eli i a bis'é: ‘Ata mi akí. Pakiko bo a yama mi?’ ‘Mi no a yama bo, mi yu. Bai drumi atrobe,’ Eli a rospondé.
7Ainda Samuel no tabata konosé SEÑOR, pasobra nunka e no a haña un mensahe di SEÑOR.
8Pa di tres bia SEÑOR a yama Samuel; esaki a lanta i a bai serka Eli: ‘Ata mi akí. Pakiko bo a yama mi?’ E ora ei Eli a komprondé ku ta SEÑOR tabata yama e hóben
9i el a bis'é: ‘Bai drumi i si SEÑOR yama bo, rospond'É: “Papia, SEÑOR, pasobra bo sirbidó ta skucha.” ’ E ora ei Samuel a bolbe bai drumi na su lugá.
10Despues SEÑOR a bini, keda para i a yam'é meskos ku e bianan promé: ‘Samuel, Samuel.’ ‘Papia, pasobra bo sirbidó ta skucha,’ Samuel a kontestá.
11SEÑOR a bis'é: ‘Mi ta bai hasi un kos asina teribel ku Israel, ku tur hende ku tende, nan orea lo keda flùit.
12E dia ei sin falta lo Mi kumpli ku tur loke Mi a bisa Eli tokante su famia.
13Mi a anunsi'é ku Mi ta bai kastigá henter su famia pa semper, pa e maldat ku e sa di dje kaba: pasobra su yunan a maldishoná Dios pero e no a skual nan.
14P'esei Mi a hura famia di Eli ku nada, ni sakrifisio ni ofrenda, lo no por drecha e maldat ku nan a hasi.’
15Despues Samuel a keda riba kama te mainta; e ora ei el a habri e portanan di santuario di SEÑOR. E tabatin miedu di konta Eli e vishon ku el a haña,
16ma Eli a yam'é i bis'é: ‘Samuel, mi yu.’ ‘Ata mi akí,’ el a kontestá.
17Eli a puntr'é: ‘Kiko SEÑOR a bisa bo? Hasi mi un fabor, no skonde nada pa mi. Dios kastigá bo mal kastigá si bo skonde algu pa mi di tur loke El a bisa bo.’
18Samuel a kont'é tur kos sin skonde nada i Eli a sklama: ‘E ta SEÑOR. E hasi loke E ta haña ta bon.’
19Samuel a bira grandi i SEÑOR tabata kuné. SEÑOR a kumpli ku tur loke El a primintié.
20I henter Israel di Dan den nort te Beer-Shèba den zùit, a rekonosé ku Samuel tabata un berdadero profeta di SEÑOR.
21Despues SEÑOR a sigui aparesé na Silo i a revelá Su mes na Samuel pa medio di su palabra.
Who We AreWhat We EelieveWhat We Do
2025 by iamachristian.org,Inc All rights reserved.
