Sirag 19 - Papiamentu Bible with DC 2013(PBDC13)

1Un obrero ku gusta dal beter

no ta bira riku nunka;

esun ku no paga tinu riba gastunan chikí,

pokopoko ma sigur ta ruiná su mes.

2Biña i hende muhé ta hiba hopi hende sabí riba kaminda robes

i esun ku anda ku muhé di bida ta pèrdè tur kòntròl.

3Su libertinahe ta bira su morto,

lo e bira propiedat di bichi i putrimentu.

Ora bo papia òf skucha

4Es ku duna konfiansa muchu lihé, no ta usa su kabes;

es ku kometé e eror akí, ta hasi su mes daño.

5Es ku tin goso den maldat, ta kondená su mes ku esei.

6Es ku no gusta redu, ta spar su mes hopi sufrimentu.

7No sigui konta redu, e ora ei bo mes lo no sufri daño.

8No papia riba hende, ni riba amigu, ni riba enemigu.

Bo por revelá algu, ora keda ketu ta hasi bo kulpabel.

9Si bo papia riba un hende i e haña sa,

lo e deskonfiá bo i ku tempu e ta kuminsá odia bo.

10Si bo tende algu, bai kuné den bo graf!

No tene miedu, lo e no pone bo rementá!

11Un sekreto ta duna un kèns doló

manera un yu ta duna su mama na parto.

12Manera un flecha pegá den un bèl di pia,

asina un sekreto ta hinka paden di un kèns.

Atenshon pa amigu

13Averiguá serka bo amigu:

podisé no t'e a hasié;

i si t'e a hasié,

perkurá pa e no keda hasié.

14Averiguá serka bo próhimo:

podisé no t'e a bisa e kos ei,

i si t'e a bisa,

perkurá pa e no bis'é atrobe.

15Averiguá serka bo amigu,

pasobra hopi bia ta hasimentu di redu;

no kere tur loke hende bisa.

16Un hende por kibuk'é, sin ta su intenshon;

i ken no a peka nunka ku su lenga?

17Averiguá serka bo próhimo,

no bula zundra mesora.

Bai segun Lei di Altísimo.Kuidou ku hende djispou

20Sabiduria semper ta mustra rèspèt pa Señor,

sabiduria ta enserá kumpli ku Lei.

22No ta sabiduria si un hende ta sabí den maldat,

i no ta un bon idea pa sigui konseho di mal hende.

23Tin astusia ku ta detestabel,

i tin hende ku ta ignorante i esei no ta nan falta.

24Mihó un hende ignorante pero deboto

ku un hende hopi inteligente ku ta violá Lei.

25Tin hende djispou ku ta violá derecho,

tin ku ta fingi pa gana un kaso.

26Tin ku ta kana tristu i tur doblá,

pero di paden nan ta korumpí.

27Nan ta kana baha wowo i hunga surdu,

pero si bo pèrdè nan un ratu for di bista, nan ta hòrta bo.

28Si nan no tin forsa pa hasi bo daño awor akí,

e promé chèns ku nan haña nan lo perhudiká bo.

29Bo por konosé un hende na su aparensia,

na su moda di hasi bo por weta si e ta un hende serio.

30Su moda di bisti, di sonreí i di kana, ta bisa ken e ta.