1Ora Hiram, rei di Tiro, a tende ku nan a konsagrá Salomon rei na lugá di su tata David, el a manda su embahadornan serka Salomon, pasobra semper e tabata mashá amigu di David.
2E ora ei Salomon a manda bisa Hiram:
3‘Bo sa ku pa motibu di e gueranan ku el a hañ'é aden di tur banda David, mi tata, no por a traha un tèmpel na honor di SEÑOR, su Dios, te ora SEÑOR a someté su enemigunan n'e.
4Awor SEÑOR, mi Dios, a duna mi trankilidat riba tur tereno, no tin ni atversario ni ningun peliger mas.
5P'esei mi ta pensa awor di traha un tèmpel na honor di SEÑOR, mi Dios. Pasobra SEÑOR a primintí mi tata David: “E yu ku lo Mi pone riba trono na bo lugá, e yu ei lo traha e tèmpel na mi honor.”2 Samuel 7:12-13; 1 Krónikanan 17:11-12
6P'esei laga kap sedernan di Libanon pa mi. Mi trahadónan lo yuda esnan di bo. Mi ta paga bo e suèldu ku bo pidi pa bo trahadónan, pasobra bo mes sa ku ningun di nos aki banda no por kap palu bon manera e hendenan di Sidon.’
7Ora Hiram a haña e rospondi di Salomon, el a bira mashá kontentu i bisa: ‘Bendishoná sea SEÑOR awe, komo El a duna David un yu asina sabí pa goberná e nashon grandi akí!’
8Hiram a manda bisa Salomon: ‘Mi a haña bo rospondi, lo mi duna bo kuantu palu di seder i di siprès ku bo ke.
9Mi trahadónan lo baha e palunan di Libanon te na laman, ei mi mes lo laga traha vlòt ku nan i transportá nan te na e lugá ku bo indiká. Na e lugá ei ta lòs nan for di otro i bo por rekohé nan. Pa loke ta toka abo, kumpli ku mi deseo i manda provishon na mi palasio.’
10Asina Hiram a duna Salomon kuantu palu di seder i di siprès ku e tabata ke,
11i Salomon tabata sòru pa provishon na palasio di Hiram. Aña aden, aña afó Salomon tabata entregá Hiram: 4.400.000 kana di trigo i 4400 liter di zeta di oleifi puru.
12SEÑOR a duna Salomon sabiduria manera El a primintí. Ademas Hiram i Salomon a sera un kombenio, i tabata reina pas entre nan.
13Rei Salomon a laga yama hende di tur parti di Israel pa trabou obligatorio. Nan tabata 30.000 hòmber.
14Tur luna e tabata manda un grupo di 10.000 di e hendenan akí Libanon i nan tabata pasa un luna na Libanon i dos luna na kas. Adoniram tabata enkargá ku e trabounan obligatorio.
15Ademas Salomon tabatin 70.000 hende pa karga kos i 80.000 kapdó di piedra den seru,
16sin konta e 3300 kapatas pa dirigí e trabounan.
17Rei a laga kap piedra grandi i kostoso for di den seru pa despues kap nan na midí i traha fundeshi di tèmpel riba nan.
18Trahadónan di Salomon i di Hiram i hendenan di fishi di Guebal a kòrta i drecha e balkinan i e piedranan pa konstrukshon di e tèmpel.
Who We AreWhat We EelieveWhat We Do
2025 by iamachristian.org,Inc All rights reserved.
