1E palabranan ei a duel mi, mi a kuminsá yora i yen di pena mi a resa:
2‘Hustu Bo ta, o SEÑOR,
Bo ta hasi bon so,
Bo ta aktua ku amor i fieldat.
Abo ta hues di mundu.
3Awor, SEÑOR, kòrda riba mi. Fiha bo bista riba mi.
No kastigá mi pa piká- i faltanan
ku ami òf mi antepasadonan a hasi,
4pasobra mi no a obedesé bo mandamentunan.
Bo a entregá nos na sakeo, deportashon i morto,
nos a bira mofa di e pueblonan
bou di kua Bo a plama nos.
5Tur bo huisionan ta korekto,
pasobra Bo ta trata mi segun mi pikánan,
nos no a kumpli ku bo mandamentunan,
nos no a keda fiel na Bo.
6Wèl, hasi ku mi manera Bo haña ta bon,
sea asina bon di kita rosea di bida fo'i mi
pa mi disparsé for di e mundu akí i bira stòf.
Mi ta preferá muri ku sigui biba,
awor ku mi mester tende tantu mofa ku mi n' meresé,
awor ku mi fèrdrit ta asina grandi.
Por fabor, saka mi for di e ansha grandi akí,
laga mi bai mi lugá eterno.
No bira lomba pa mi, SEÑOR.
Mi ta preferá morto riba un bida ku asina tantu ansha.
Mi n' por mas ku tantu mofa.’
Nan ta hasi mofa di Sara7Riba e mesun dia un katibu muhé di Raguel, tata di Sara, a hasi mofa di Sara. Raguel tabata biba na Ekbátana na Media.
8T'asina ku Sara a kasa shete bia kaba, pero e mal demoño Asmodao a mata e kasánan, promé ku nan por tabatin relashon íntimo ku Sara manera den un matrimonio normal. Awor e katibu muhé a bisa Sara: ‘Abo t'esun ku ta mata bo kasánan! Ya bo tabatin shete kasá, pero bo no por a karga fam di niun di nan.
9E echo ku bo kasánan ta muri no ta motibu pa bo kastigá nos. Mare bo por muri samsam ku nan sin haña yu nunka!’
10Sara a bira mashá tristu i a kuminsá yora. E ora ei el a bai den sòlder di kas di su tata ku intenshon di horka su kurpa. Despues di a pensa bon el a bisa: ‘Lo ta un bèrgwensa pa mi tata si nan tira na su kara: “Bo tabatin un yu muhé so, mashá stimá, i el a horka su kurpa pasobra e tabatin fèrdrit.” Hasiendo esei mi ta pone mi tata bieu muri di tristesa. Mihó mi no horka mi kurpa; pero mi ta bai pidi SEÑOR pa E laga mi muri, ya mi no tin mester di tende mas ofensa den mi bida.’
Sara ta resa pa e muri11Sara a resa man habrí pará den bentana:
‘Bendishoná Bo ta, Dios ku tin kompashon,
i bendishoná ta bo nòmber pa semper;
tur bo kriaturanan mester alabá Bo eternamente.
12Anto, SEÑOR, na Bo mi ta akudí, riba Bo mi ta fiha mi bista.
13Por fabor, laga mi bai for di mundu.
Mi n' por mas ku tantu mofa.
14Bo sa, SEÑOR, ku mi no a buska hòmber pa loko,
15mi no a mancha ni mi nòmber
ni esun di mi tata aki den estranheria.
Ta mi tata su úniko yu mi ta,
e no tin yu hòmber pa ta su heredero
ni famia tampoko
ku mi mester tene mi mes liber p'e.
Ya mi a pèrdè shete kasá;
pakiko sigui biba?
Pero si Bo no ke kita mi bida,
skucha anto, SEÑOR, kon nan ta hasi mofa di mi.’
E plan di Dios16Altísimo a skucha orashon di Tobit i Sara.
17Dios a manda Rafael pa kura nan dos, pa kita e flishi blanku for di wowo di Tobit pa e por a mira Dios su lus atrobe, pa duna Sara, yu di Raguel, komo kasá na Tobias, yu di Tobit, i pa libr'é di e mal demoño Asmodao. Enberdat Tobias tabatin mas derechi di kasa ku Sara ku kualke otro pretendiente.
Na mes momento ku Tobit a bolbe drenta su kas, Sara tambe a baha for di su kuartu riba dak.
Who We AreWhat We EelieveWhat We Do
2025 by iamachristian.org,Inc All rights reserved.
