Salmo 145 - Papiamentu Bible with DC 2013(PBDC13)

SALMO 145Mi ta alabá Dios pa su grandesa i bondatKantika di alabansa. Di David.

1Mi Dios, mi Rei, mi ke alsa Bo,

alsa bo nòmber pa semper i semper.

2Mi ke bendishoná Bo sin fin,

alabá bo nòmber semper bai.

3SEÑOR ta grandi, digno di alabansa,

ningun hende no por midi su grandesa.

4Ún generashon tras di otro

ta kanta gloria di loke Bo a hasi,

lo proklamá bo akshonnan poderoso.

5Bo mahestat, splendor i gloria nan lo konta

i mi ke testiguá di bo milagernan.

6Nan lo papia di bo echonan spantoso

i mi ke proklamá bo grandesa;

7nan lo gaba bo bondat inmenso

i nan lo hubilá bo hustisia.

8SEÑOR ta kompasivo i tierno,

yen di pasenshi i bondat amoroso.

9SEÑOR ta bon pa tur loke ta eksistí,

yen di ternura pa tur su kriaturanan.

10Tur bo obranan, SEÑOR, ta elogiá Bo,

i tur bo fielnan lo duna Bo alabansa.

11Nan ta kanta gloria di bo reino,

bo poder ta tur kaminda papiá,

12pa mundu tende di bo obranan potente

i di splendor i mahestat di bo reino.

13Bo reino ta un reino eterno,

bo dominio ta pa tur generashon.

SEÑOR ta fiel na tur su promesanan,

bondadoso den tur su akshonnan.

14Esnan na punto di kai E ta wanta,

E ta lanta esnan ku ta kargá.

15Tur ta fiha nan bista riba Bo

i Bo ta duna nan kuminda na tempu.

16Bo ta habri bo man i ta kumpli

ku deseo di tur loke tin bida.

17SEÑOR su moda di hasi ta hustu,

E ta bondadoso den su obranan.

18SEÑOR ta serka esnan ku t'invok'É

serka tur ku ta yam'É di kurason.

19E ta kumpli ku deseo di su fielnan,

E ta tende nan gritu i ta salba nan.

20SEÑOR ta warda esnan ku ta stim'É,

pero l'E kaba ku tur malechor.

21Mi ke kanta alabansa di SEÑOR.

Tur ser bibu, elogiá su nòmber santu

pa semper, te den tur eternidat!