Génesis 45 - Papiamentu Bible with DC 2013(PBDC13)

Jozef ta bisa su rumannan ta ken e ta

1Jozef no por a dominá su sentimentunan mas dilanti di tur su sirbidónan, p'esei el a manda nan tur bai. Ora e so a keda ku su rumannan el a bisa nan ta ken e ta.Echonan 7:13

2El a kuminsá yora asina duru ku tur e egipsionan a tende i ku e notisia a yega te na palasio di fárao.

3Jozef a bisa su rumannan: ‘Mi ta Jozef. Mi tata ta na bida ainda?’ Nan a spanta asina tantu ku nan a pèrdè abla.

4Pero Jozef a bisa nan: ‘Bini mas serka.’ Ora nan a yega mas serka el a bisa nan: ‘Mi ta boso ruman Jozef ku boso a bende i a laga bai Egipto.

5No bira tristu awor, ni haña rabia riba boso mes pasobra boso a bende mi. Dios a manda mi boso dilanti pa spar boso bida.

6Dos aña kaba tin skarsedat di kuminda den e pais akí, ainda lo sigui sinku aña mas ku hende lo no plug ni kosechá.

7P'esei Dios a manda mi boso dilanti pa salba bida di hopi di boso i pa boso famia por sigui eksistí.

8Asina ta ku no ta boso a manda mi e lugá akí pero Dios. El a hasi mi konsehero di fárao, hefe di su kas i gobernador di henter Egipto.

9Bai lihé serka mi tata i bis'é: “Bo yu Jozef ta laga bisa: Dios a hasi mi gobernador di henter Egipto. Bini mas lihé posibel.

10Bo por biba den region di Goshen, serka di mi, huntu ku bo yunan i bo ñetunan, ku tur bo bestianan i ku tur loke bo tin.

11Aki lo mi duna abo i bo famia i tur ku ta huntu ku bo di kome, pasobra sinku aña mas lo tin skarsedat di kuminda.”Echonan 7:14 Mi no ke pa boso kai den pobresa.

12Mi ruman Benhamin i boso por mira ku boso mes wowo ku t'ami mes ta papia ku boso.

13Konta mi tata kuantu poder mi tin na Egipto i kont'é tur loke boso a mira. Trese mi tata mas pronto posibel aki!’

14Jozef a brasa su ruman Benhamin i a kuminsá yora di alegria. Benhamin tambe a yora i bras'é.

15Despues Jozef a sunchi su otro rumannan, e tabata yora ora ku e tabata brasa nan. Awor numa nan a riska papia kuné.

16Ora e notisia ku Jozef su rumannan a bini a yega palasio di fárao, fárao i tur su funshonarionan a keda kontentu.

17Fárao a bisa Jozef: ‘Bisa bo rumannan pa nan karga nan bestianan i bai Kanaan bèk.

18Bisa nan trese nan tata i famianan serka mi. Lo mi duna nan e parti mas mihó di e pais i nan lo kome e mihó produktonan ku e pais ta produsí.

19Duna òrdu pa nan bai ku garoshi for di Egipto ya nan por trese nan yunan, nan kasánan i tambe nan tata aki.

20No mester duel nan di laga algu atras, pasobra aki nan lo haña e parti mas mihó di Egipto.’

21E yunan di Israel a hasi manera a bisa nan. Jozef a duna nan garoshi manera e fárao a ordená, tambe el a duna nan kuminda pa pasa kaminda.

22Jozef a duna nan tur paña nobo, pero Benhamin el a duna sinku sèt di paña ademas 300 moneda di plata.

23Pa su tata el a manda dies buriku kargá ku e mihó produktonan di Egipto. Fuera di esei el a manda dies buriku mas, kargá ku maishi, pan i otro kuminda pa su tata haña gasta na kaminda.

24Ora Jozef a tuma despedida di su rumannan, el a bisa nan: ‘No pleita na kaminda.’

E rumannan a bai.

25Nan a sali for di Egipto i a yega Kanaan serka nan tata Yakob.

26Nan a bis'é: ‘Jozef ta na bida ainda. E ta manda riba henter Egipto!’ Yakob no a hiba ni trese, e no por a kere.

27Pero ora ku nan a kont'é tur kos ku Jozef a papia ku nan i ku el a weta e garoshi ku Jozef a manda for di Egipto pa bin busk'é, el a bini bei atrobe.

28El a bisa: ‘Basta! Mi yu Jozef ta na bida ainda, mi ke bai mir'é promé mi muri.’