Judit 3 - Papiamentu Bible with DC 2013(PBDC13)

1P'esei nan a manda mensaheronan serka dje pa boga pa pas ku e siguiente palabranan:

2‘Nos, sirbidónan di e gran rei Nebukadnèsar, nos t'aki na bo pia; hasi ku nos manera bo haña ta bon.

3Mira, nos kasnan, henter nos region, tur e kunukunan di trigo, nos karnénan, nos bakanan i tur nos kuránan di bestia ta na bo disposishon, hasi ku nan manera bo ta haña ta bon.

4Nos siudatnan i nan habitantenan ta bo katibu, bin bishitá nan ora ku bo ke.’

5E mensaheronan a bai serka Holoferne i a dun'é e rospondi akí.

6E ora ei Holoferne a bai e region di kosta ku su ehérsito, pone destakamento di sòldá den tur siudat reforsá i inkorporá e mihó sòldánan den su trupanan ousiliar.

7Henter pais i tur siudat a risibié ku slengu di flor, ku baile i tokamentu di tamburein.

8Tòg el a destruí tur nan santuarionan i a laga kap nan palunan sagrado. El a haña òrdu pa kaba ku tur dios na mundu, pa di e manera ei tur pueblo adorá Nebukadnèsar so i hende di tur idioma i tribu invok'é komo dios.

9Asina Holoferne a aserká sabana di Esdrelòn, banda di Dotan, un lugá na pia di e kadena grandi di serunan di Huda.

10El a lanta su tèntnan entre Gueba i Skitópolis i a keda aya un luna largu pa kompletá provishon di su ehérsito.