Tobit 5 - Papiamentu Bible with DC 2013(PBDC13)

Preparashonnan pa biahe

1E ora ei Tobias a kontestá su tata Tobit: ‘Tata, lo mi hasi tur loke bo a enkargá mi.

2Pero kon mi por bai tuma e plaka serka Gabaèl, si e no konosé mi ni mi tampoko no konos'é? Ki señal mi por dun'é pa e aseptá mi, konfia mi i duna mi e plaka? Ademas mi no konosé e kaminda pa bai Media.’

3E ora ei Tobit a kontestá su yu Tobias: ‘El a firma un papel pa mi i mi tambe a firma, e ora ei mi a sker e papel na dos pa nos tur dos keda ku mitar; e mitar ku ta tok'é mi a pone huntu ku e plaka. Figurá bo ku ya a hasi binti aña ku mi a depositá e plaka ei! Awor, mi yu, buska un hende di konfiansa pa biaha ku bo, ora bo bini bèk nos lo pag'é. Bai tuma e plaka serka Gabaèl.’

4Tobias a bai buska un hende ku konosé e kaminda bon i ku por a kompañ'é bai Media. E no a kaba di sali for di kas ku ata el a topa kara kara ku angel Rafael. Pero Tobias no tabata sa ku tabata un angel di Dios.

5El a puntr'é: ‘Hóben, di unda bo a bini?’ E angel a rospond'é: ‘Mi ta un israelita meskos ku bo, mi a bini aki bin buska trabou.’ Tobias a puntr'é: ‘Bo konosé e kaminda pa bai Media?’

6‘Klaro,’ el a kontestá, ‘mi tabata aya hopi bia. Mi konosé e kamindanan aya hopi bon. Mi a bai Media hopi bia i ku regularidat mi a keda na kas di Gabaèl, ku tambe ta israelita i ta biba na Rages na Media. Si lanta pia, ta tuma dos dia di Ekbátana pa Rages. E dos siudatnan ta keda den region montañoso.’

7Tobias a bis'é: ‘Warda mi un ratu, mi ta bai bisa mi tata. Bo mester kompañá mi. Lo mi paga bo hopi bon.’

8E angel a kontestá: ‘Bai numa, pero hasi lihé.’

9Tobias a bai paden i a bisa su tata: ‘Tende, ya mi a haña un hende, israelita meskos ku nos.’

Tobit a kontest'é: ‘Lag'é pasa serka mi pa mi haña sa di kua tribu i di kua famia e ta i ku mi por konfi'é pa biaha ku bo, mi yu.’

10Tobias a sali bai yama e hóben i bis'é: ‘Hóben, mi tata ta yama bo.’ E angel a drenta i Tobit a kumind'é promé. E angel a kontestá: ‘Mi ta spera ku tur kos ta bon ku bo.’ Tobit a rospond'é: ‘Ta ki bon mi por ta awor? Mi ta siegu. Mi no por mira lus di solo. Mi ta meskos ku defuntu den reino di morto, ku no ta mira lus mas. Mi ta morto na bida. Mi ta tende hende papia pero mi no por mira nan.’ E angel a kontest'é: ‘Keda konfia, Dios lo no tarda pa kura bo. Keda konfia!’ Tobit a bis'é: ‘Mi yu Tobias ke biaha bai Media. Bo por kompañ'é i sirbi pa su guia? Lo mi paga bo hopi bon.’ El a rospond'é: ‘Sí, mi por kompañ'é. Mi konosé e kamindanan aya bon. Hopi be mi a bai Media i mi a pasa den tur e sabana- i serunan aya. Mi konosé tur e kamindanan aya.’

11Tobit a puntr'é: ‘Ruman, na kua tribu i na kua famia bo ta pertenesé? Splika mi.’

12E angel a kontestá: ‘Pakiko bo mester sa di kua tribu mi ta?’ ‘Ruman, mi ke sa ken bo ta realmente i kon yama bo,’ Tobit a insistí.

13E otro a kontestá: ‘Mi ta Azarías, yu di e gran Ananías, un di bo kompatriotanan.’

14E ora ei Tobit a bis'é: ‘Bonbiní, ruman, no tuma mi na malu ku mi ker a sa na kua famia bo ta pertenesé. Ta resultá ku bo ta nos famia. Bo ta di un famia prestigioso. Mi a konosé Ananías i Yatan, e dos yu hòmbernan di Shimi, e ansiano. Nan tabata bai Herusalèm ku mi pa asistí na sirbishi di Dios i nan no a kita for di e bon kaminda. Bo parientenan ta bon hende! Bo ta di un famia ekselente. Bonbiní!’

15Despues el a añadí: ‘Lo mi paga bo ocho darik di plata pa dia, fuera di loke abo i mi yu mester pa boso mantenshon.

16Kompañá mi yu riba e biahe akí i mi ta duna bo algu èkstra riba bo pago.’

17E angel a rospondé: ‘Mi ta bai kuné. Keda trankil. Nos ta bini bèk sano i salvo manera nos ta bai. E kaminda ta seif.’ Tobit a bisa: ‘Dios bendishoná bo, ruman!’ E ora ei el a yama su yu i bis'é: ‘Mi yu, prepará bo ekipahe di biahe i bai ku bo ruman. Dios ku ta den shelu protegé boso aya i trese boso bèk serka mi sano i salvo. Ku su angel kompañá i protegé boso, mi yu.’ Tobias a sunchi su mama i su tata i a sali di biahe. Tobit a bolbe dese'é: ‘Bon biahe.’

18Pero e mucha su mama Ana a kuminsá yora i a bisa Tobit: ‘Pakiko bo a manda mi yu bai? E n' tabata un apoyo pa nos miéntras e tabata huntu ku nos?

19Pakiko nos mester di mas plaka? Laga e plaka keda aya na lugá di nos yu hòmber.

20Loke SEÑOR a duna nos pa biba di dje, ta mas ku basta.’

21Tobit a kontest'é: ‘No preokupá bo. Nos yu lo bini bèk sano i salvo manera el a bai i bo mes wowo lo bolbe mir'é dia e bini bèk sano i salvo serka bo.

22No preokupá bo, mi ruman, bo no mester tin miedu ku algu malu ta pasa nan. Un bon angel lo kompañ'é i lo e tin un bon biahe. E ta bini bèk sano i salvo.’

23E ora ei e mama a keda ketu i a stòp di yora.