Sirag 17 - Papiamentu Bible with DC 2013(PBDC13)

Kreashon di hende

1Di tera Dios a krea hende

i lo laga nan bolbe bira tera.

2El a duna nan un sierto kantidat di dia

ku poder riba tur loke ta eksistí na mundu.

3El a krea hende segun su imágen

i bistié ku donnan ku ta pas kuné,

4El a yena tur animal ku rèspèt pa nan

i a hasi nan shon riba bestia i para.

6El a duna nan mente pa pensa,

konsenshi, lenga, wowo i orea.

7El a yena nan ku siensia i inteligensia

i siña nan distinguí bon fo'i malu.

8El a yena kurason di hende ku su lus

pa mustra nan kon grandi Dios su obranan ta.

10Asina nan ta kapas di alabá Dios su nòmber sagrado

i gaba su milagernan grandi.

11Pero E no a duna nan inteligensia so,

pero tambe e Lei ku ta duna bida,

12El a establesé un aliansa eterno ku nan

i a revelá nan su mandamentunan.

13Wowo di hende a kontemplá grandesa di Dios su gloria

i nan orea a tende su stèm mahestuoso.

14Dios a bisa nan: ‘Warda boso di tur maldat’,

i a preskribí kiko ta nan deber pa ku otro.Dios su bista ta riba bon i malu

15Semper hende su kamindanan ta konosí pa Dios,

pasobra pa su bista nada no ta keda skondí.

17Dia El a parti e nashonnan riba mundu,

El a pone un gobernador pa kada un;

pero Israel ta propiedat di Señor.

19Tur nan echonan ta kla manera di dia p'E

i kontinuamente su bista ta riba nan andá.

20Nan mal echonan no ta skondí p'E

i Señor konosé tur nan pikánan.

22E ta warda karidat di hende manera un rench'i seyo

i kuida nan bon obra manera su pret'i wowo.

23Finalmente lo E reis riba e malechornan i kastigá nan;

lo E duna nan tur kastigu meresí.

24Ma tur ku tin duele di nan piká

Dios ta duna chèns pa kuminsá un bida nobo.

E ta animá esnan ku ta pèrdè kurashi.

Dios ta invitá hende pekadó pa bolbe serka djE

25Bolbe serka Señor i bira lomba pa piká.

Resa na Dios i ofend'É ménos.

26Bolbe serka Dios Altísimo i bandoná maldat.

Odia idolatria di henter bo kurason.

27Den reino di morto no ta duna gloria na Señor Altísimo,

pasobra aya no tin ningun hende bibu pa alab'É.

28Esun ku a muri ta manera e no ta eksistí mas,

serka morto alabansa ta deskonosí.

Solamente esnan ku tin bida i salú, ta kapas na alabá Señor.

29Ki grandi ta mizerikòrdia di Señor!

Ki grandi su pordon pa esnan ku bolbe serka djE.

30No ta tur kos ta posibel pa hende;

ningun ser humano no ta inmortal.

31No tin un kos ku ta bria mas tantu ku solo,

i tòg e tambe tin eklipse.

Kòrda hende di karni i wesu;

haña e ta hañ'é ku mal pensamentu.

32Dios ta yama ehérsito di shelu pa duna kuenta i rason;

kòrda hende ku no ta nada mas ku stòf i shinishi.