Judit 8 - Papiamentu Bible with DC 2013(PBDC13)

II. UN MUHÉ HUDIUUN MUHÉ HUDIU TA KRITIKÁ E HÒMBERNANIntrodukshon di Judit

1Judit a tende loke a pasa.

Judit tabata yu di Merari. Aki ta sigui antepasadonan di Judit: Merari tabata yu di Oks, Oks tabata yu di Jozef, Jozef tabata yu di Uziel, Uziel tabata yu di Helkia, Helkia tabata yu di Ananías, Ananías tabata yu di Gideon, Gideon tabata yu di Rafain, Rafain tabata yu di Ahitub, Ahitub tabata yu di Elías, Elías tabata yu di Hilkías, Hilkías tabata yu di Eliab, Eliab tabata yu di Natanaèl, Natanaèl tabata yu di Salamiel, Salamiel tabata yu di Sarasadai, Sarasadai tabata yu di Yakob.

2Judit su kasá, Manase, tabata pertenesé na e mesun tribu i famia kuné. Manase tabatin tres aña i kuater luna morto.

3Ora e tabata kontrolá e maradónan di trigo den sabana durante kosecha di sebada, el a haña un zònestek. El a pone kurpa na kama i a muri na Betülua, kaminda e tabata biba. Nan a der'é serka su antepasadonan den e sabana ku ta keda entre Dotan i Balamon.

4Awor Judit tabata biba komo biuda den su kas.

5El a laga traha un kuartu pa su mes riba e dak plat. El a pone paña di rou na su kurpa i riba esaki el a bisti un paña di biuda.

6Tur dia e tabata yuna, ku eksepshon di bispu di sabat i sabat mes, bispu di luna nobo i dia di luna nobo, ku eksepshon tambe di dianan di fiesta i dianan di alegria di Israel.

7Judit tabata mashá bunita. Su kasá Manase a laga oro, plata, sirbidó, kriá, bestia di kria i kunukunan p'e. E tabata manehá tur kos bon.

8Niun hende no tabatin nada di bisa di dje. E tabata obedesé Dios su leinan den tur kos.

Judit ta kritiká e lidernan

9Judit a tende di e eksigensianan sensurabel ku e pueblo, desesperá pa falta di awa, a bini kuné pa e gobièrnu di siudat. Tambe el a tende di e kontesta ku Uzías a duna nan, esta ku el a hura e pueblo ku lo e entregá e asirionan e siudat despues di sinku dia.

10Judit a manda su kriá, ku tabata enkargá ku tur su propiedatnan, serka Kabris i Karmi, ansianonan di e siudat, pa pidi nan bini serka dje.

11Ora nan a yega serka dje, Judit a bisa nan: ‘Skucha mi, lidernan di Betülua: Boso no a hasi bon di primintí e pueblo awe ku boso lo entregá e siudat na nos enemigunan, si Señor no yuda boso den sinku dia. Tampoko boso no a hasi bon di asta mara boso na e promesa ku un huramentu na Dios.

12Ken boso ta kere ku boso ta, ku boso a riska pone Dios na prueba awe i ku boso, hende komun, ta pone boso riba Dios?Deuteronomio 6:16

13Boso ta purba di komprondé desishonnan di Señor Todopoderoso, pero nunka ni den eternidat boso lo no logra.

14Boso no por sa nunka kiko ta biba den kurason di hende ni boso no por komprondé pensamentunan di su mente. Kon boso lo por komprondé Dios antó ku a traha tur e kosnan ei, kon boso por sa kiko Dios tin den su mente i komprondé su pensamentunan?Sabiduria 9:13; Romanonan 11:33 Nò, rumannan, stòp di ofendé Señor, nos Dios.

15Asta si E no ke yuda nos den e sinku dianan akí, E ta keda ku e libertat sea di salba nos òf di destruí nos den bista di nos enemigu dia E haña ta bon.

16Pero boso no mester purba fòrsa desishonnan di Señor, nos Dios, hende no por oblig'É hasi algu, no por traha lei pa Dios komo si fuera ta hende E ta.

17P'esei nos mester warda ku pasenshi te ora E bin salba nos; nos mester pidi su yudansa. Lo E skucha nos ora E haña ta bon.

18For di dia nos a bolbe nos pais, no tin niun di nos tribu ni famia ni region òf siudat, ku ta bùig pa diosnan ku man di hende a traha. Ántes sí esei tabata sosodé.

19Pa e motibu ei Dios a laga mata nos antepasadonan ku spada, nan a bira víktima di sakeo i nos enemigunan a kousa nan gran desaster.Salmo 78:56-64

20Pero nos no ta rekonosé ningun otro Dios ku no t'E. P'esei nos por konfia ku E no ta laga ni nos ni nos pueblo na kaya.

21Kòrda, si nos kai den nan poder, henter Huda tambe ta kai den man dje enemigu i nan lo destruí nos santuario. E ora ei ta nos falta si nan profaná nos santuario i Dios lo eksigí nos bida p'esei.

22Dios lo pone nos responsabel pa morto di nos rumannan, deportashon di nos pueblo i ruina di nos herensia. Dios lo plama nos komo katibu bou di e pueblonan. E hendenan ku kumpra nos lo hasi chèrchè di nos i lo insultá nos.

23Nos lo no sali for di nos sklabitut, Señor ta laga nos bira un bèrgwensa pa semper.

24Ban mira rumannan, laga nos mustra nos kompatriotanan ki balor nos tin, nan bida ta dependé di nos, i e santuario, e tèmpel i altá ta para òf kai ku nos.

25Apesar di tur kos, tòg nos mester gradisí Señor, nos Dios, sí, gradisiÉ ku E ta pone nos na prueba manera El a hasi ku nos antepasadonan.

26Kòrda kon El a trata Abraham,Génesis 22:1-18 i kòrda kon El a pone IsakGénesis 25:21 na prueba i loke a pasa ku Yakob na Mesopotamia, kaminda e tabata kuida karné pa Laban,Génesis 29—31 ruman di su mama.

27Na moda di papia, Dios a laga nan tur pasa den vlam pa averiguá kon fiel nan tabata. No ta su intenshon tampoko pa kastigá òf destruí nos awor akí, pero E ta pone man duru riba nos komo su amigu, pa nos siña konos'É mihó.’

28E ora ei Uzías a kontestá Judit: ‘Tur loke bo a papia ta huisioso i ningun hende no por bisa ku bo no tin rason.

29Ademas no ta promé bia ku bo ta mustra ku bo tin sabiduria. Henter pueblo sa ku semper bo por husga na un manera sano pasobra bo ta un muhé inteligente.

30Pero e pueblo ku tabata muri di set a obligá nos bisa loke nos a bisa, nan a eksigí nos hura, i nos no por kibra nos huramentu.

31Bo ta un muhé hopi religioso, resa pa nos pa Señor laga awa kai yena nos tankinan, e ora ei nos no ta muri di set.’

32Judit a kontestá: ‘Tende, mi ta bai hasi un kos ku su fama lo yega te serka e generashonnan di nos pueblo di mas leu den futuro.

33Sòru pa awe nochi boso ta pará na porta di siudat; mi ku mi kriá lo sali for di siudat, i den e término ku boso a bisa ku mester pasa pa boso entregá e siudat na nos enemigunan, Señor lo usa mi pa salba Israel.

34Pero no purba haña sa kiko mi ta bai hasi. Mi no ta bisa nada te ora mi kaba di hasié.’

35Uzías i e lidernan a bis'é: ‘Bai na pas i Señor Dios bai bo dilanti pa kastigá nos enemigunan.’

36Nan a sali for di su kuartu riba dak i a bai para na nan pòst.