1Den anochi, riba mi kama, mi ta busk'é,
e amor di mi bida,
mi ta busk'é sin por hañ'é.
2Mi mester lanta
pa kana pasa den siudat,
den kaya- i riba plenchinan,
pa buska i buska e amor di mi bida,
sin ku mi por hañ'é!
3E guardianan riba nan ronda di vigilansia den stat
ta mira mi
i mi ta puntra nan:
‘Boso no a mira e amor di mi bida?’
4Mi n' kana pasa nan
ku ata un tiki mas ayá
mi ta topa ku e amor di mi bida.
Mi ta dal man ten'é
i mi n' ta lag'é lòs,
ku n' ta te ora mi gan'é
den kas di mi mama,
den kamber di esun ku a karga mi den su seno.
5Boso, damitanan di Herusalèm,
mi ta supliká boso ku insistensia
na nòmber di gasela- i binánan den kunuku:
no lanta stimashon,
no provok'é,
promé ku e mes ke tum'aden.
6Ken ta bini for di den desierto ayá
manera un kolumna di huma,
den un dam fragante di sensia i mira
i tur sorto di perfume eksótiko?
7Ata e talmu portátil di Salomon,
eskoltá pa sesenta sòldá,
e héroenan di mas balente di Israel.
8Nan tur ta armá ku spada,
nan ta vèrsá den bringamentu.
Kada un tin nan arma na hep,
kla pa enfrentá peliger den anochi.
9Sí, rei Salomon a laga traha un talmu
di palu noble di Libanon,
10speilunan di plata,
lomba di oro,
bòm furá ku tela kostoso;
e parti paden ta furá ku amor
pa man di mucha muhénan di Herusalèm.
11Mucha muhénan di Sion, sali pafó,
bai mira rei Salomon,
ku korona di fiesta riba su kabes,
ku su mama a bistié dia di su kasamentu,
e dia mas felis di su bida.
Who We AreWhat We EelieveWhat We Do
2025 by iamachristian.org,Inc All rights reserved.
