2 Krónikanan 13 - Papiamentu Bible with DC 2013(PBDC13)

Abías, rei di Huda(1 Reinan 15:1-7)

1Den e di diesocho aña ku Yerobeam tabata rei di Israel, Abías a bira rei di Huda.

2El a goberná tres aña na Herusalèm. Su mama Mikaya tabata yu di Uriel di Guibea.

A kuminsá un guera entre Abías i Yerobeam.

3Abías a forma un ehérsito di 400.000 sòldá bon itrein; Yerobeam a konfront'é ku un ehérsito di 800.000 sòldá bon itrein.

4Ora e ehérsitonan tabata dilanti di otro, Abías a subi seru di Semaraim den serunan di Efraim i grita: ‘Yerobeam, yu di Nebat, i israelitanan, skucha!

5Boso no sa ku SEÑOR, Dios di Israel, a sera un aliansa ku David ku no por a kibra i ku e aliansa akí ta duna e i su yu hòmbernan derechi di ta rei di Israel pa semper?

6Pero, Yerobeam, yu di Nebat, sirbidó di Salomon, yu di David, a lanta kontra su rei.

7Un sèt di bandidu a djòin e i imponé nan boluntat riba Rehabeam, yu di Salomon. Rehabeam tabata muchu yòn i sin eksperensia pa resistí nan.

8Awor boso ta kere ku boso por rebeldiá kontra e reino ku SEÑOR a duna desendientenan di David, djis pasobra boso tin un ehérsito grandi i e toronan yòn di oro ku Yerobeam a proklamá komo boso dios!

9Boso no a kore ku e saserdotenan di SEÑOR, desendientenan di Aaron, i ku e levitanan? Boso no a nombra boso mes saserdotenan, meskos ku e otro pueblonan ta hasi? Ken ku a trese un toro yòn i shete chubat'i karné boso tabata konsagrá komo saserdote di boso diosnan falsu.

10Pero nos Dios ta SEÑOR; nos no a lag'É na kaya. E saserdotenan ku ta sirbi SEÑOR ta desendientenan di Aaron, i e levitanan ta yuda nan.

11Tur mainta i anochi nan ta ofresé SEÑOR sakrifisio di kandela i nan ta kima sensia ku ta hole dushi p'E. Riba e mesa sagrado nan ta pone pan konsagrá i tur anochi nan ta sende e lampinan di zeta di e kandelar di oro. Nos sí ta atené nos na loke SEÑOR, nos Dios, a ordená nos, pero boso a bira lomba p'E.

12Dios mes ta bai nos dilanti, su saserdotenan ta para kla ku tròmpètnan pa duna e señal pa ataká. Israelitanan, no bai bringa kontra SEÑOR, Dios di boso antepasadonan, pasobra boso no ta logra nada.’

13-14Yerobeam a laga un parti di su ehérsito pasa den un bog bai tras di e hudeonan pa traha un trampa pa nan. Ora e hudeonan a wak patras, nan a ripará ku nan mester a bringa na dos banda pareu. Nan a grita pidi SEÑOR yudansa i e saserdotenan a supla tròmpèt.

15Ora e hòmbernan di Huda a dal nan gritu di bataya, Dios a laga Abías i Huda derotá Yerobeam i henter Israel.

16-17E hudeonan a mata mashá hopi israelita mes. Israel a pèrdè 500.000 sòldá bon itrein.

18Asina el a sufri un derota kompleto. E hudeonan a gana nan, pasobra nan a buska nan refugio serka SEÑOR, Dios di nan antepasadonan.

19Abías a persiguí Yerobeam i a konkistá algun di su siudatnan: Betel, Yeshana i Efron, ku e pueblonan ku tabata pertenesé na nan.

20Durante reinado di Abías, Yerobeam no por a restablesé e poder ku e tabatin ántes. SEÑOR a lag'é muri diripiente.

21Sinembargo Abías tabata bira dia pa dia mas poderoso. El a kasa ku dieskuater muhé i e tabatin bintidos yu hòmber i diesseis yu muhé.

22Sobrá historia di Abías i su hazañanan ta deskribí den e Splikashon Amplio di profeta Ido.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help