1Yoshafat a sigui su tata Asa komo rei. El a reforsá su posishon kontra Israel.
2El a pone sòldá den tur e siudatnan reforsá di Huda i a lanta pòstnan militar den henter pais, tambe den e siudatnan ku su tata Asa a konkistá di Efraim.
3SEÑOR tabata kuné, pasobra el a aktua manera su antepasado David tabata hasi den e promé añanan di su reinado. E no a adorá Baalnan,
4pero el a adorá e Dios di su antepasado David. El a aten'é na e mandamentunan di SEÑOR i no a sigui ehèmpel di Israel.
5SEÑOR a dun'é poder firme riba e reino, i henter Huda tabata dun'é regalo. El a bira mashá riku i tur kaminda e tabata honrá.
6Disididu el a sigui mandamentunan di SEÑOR i el a kita e seritunan di sakrifisio i e palunan sagrado for di den Huda.
7Den e di tres aña di su reinado Yoshafat a manda algun di su alto funshonarionan den e siudatnan di Huda pa nan duna instrukshon di lei di Dios. Nan tabata Bèn-Hail, Obadías, Zekarías, Netanel i Mikaías.
8E levitanan Shemaías, Netanías, Zebadías, Asael, Shemiramot, Yonatan, Adonías, Tobias i Tob-Adonia i e saserdotenan Elishama i Yoram tabata yuda nan.
9Nan tabatin e buki di lei di SEÑOR serka nan i nan a pasa tur siudat di Huda pa instruí pueblo.
10Tur e reinonan rondó di Huda tabatin asina miedu di SEÑOR ku nan no a riska kuminsá guera ku Yoshafat.
11Algun filisteo a trese regalo p'e, entre otro un sierto kantidat di plata. Asta e arabirnan a trese 7700 chubat'i karné i 7700 chubat'i kabritu p'e.
12Pokopoko Yoshafat a alkansá tòp di su poder. Den henter Huda el a konstruí fòrti i siudat pa warda provishon.
13Tambe e tabatin provishon wardá den sobrá siudatnan di Huda. Su mihó sòldánan tabata stashoná na Herusalèm.
14Nan tabata repartí segun famia. E siguiente komandantenan di ehérsito a bini di Huda:
komandante Adna ku tabatin mando riba 300.000 hòmber;
15komandante Yohanan ku tabatin mando riba 280.000 hòmber;
16komandante Amasías ku tabatin mando riba 200.000 hòmber; Amasías tabata yu di Zikri, el a dediká su bida na SEÑOR.
17E komandantenan di famia di Benhamin tabata:
Elyada, un sòldá balente, ku tabatin mando riba 200.000 hòmber, armá ku bog i eskudo;
18Yozabad ku tabatin mando riba 180.000 sòldá, kla pa bai guera.
19E hòmbernan akí tabata na disposishon di rei, fuera di e trupanan ku e tabatin plamá den henter Huda, den e siudatnan reforsá.
Who We AreWhat We EelieveWhat We Do
2025 by iamachristian.org,Inc All rights reserved.
