Sabiduria 15 - Papiamentu Bible with DC 2013(PBDC13)

Konfeshon di e úniko Dios

1Abo sinembargo, Abo nos Dios, ta bon, fiel i tin pasenshi, Bo ta goberná tur kos ku mizerikòrdia.

2Asta ora nos peka tambe, nos ta di Bo, pasobra nos ta rekonosé bo poder dibino; pero nos no ke peka, pasobra nos sa ku nos ta di Bo.

3Pasobra konosé Bo ta nifiká perfekshon i rekonosé bo poder ta kondusí na inmortalidat.

4Nós, e inventonan sensurabel di hende no a kita nos for di kaminda; e estatuanan luangu pintá, e chochorianan ei trahá pa man di artesano, no a impreshoná nos.

5Ta hende sin sintí so, ta laga kos ku ta lombra bunita impreshoná nan i ta sinti nan atraé pa un imágen morto di un dios morto.

Diosnan di klei

6Esnan ku ta traha diosnan falsu asina, esnan ku ta atmirá nan, esnan ku ta adorá nan, nan tur ta na mes manera enamorá di maldat i ta meresé ku nan speransa ta keda defroudá.

7Un trahadó di wea, por ehèmpel, ku ta machiká e klei moli ku mashá esfuerso, ta duna pa nos komodidat un pa un su forma; sin hasi distinshon e ta forma for di e mesun klei tantu e kosnan di uso den kas komo pa otro uso; ta e trahadó di wea ta disidí destinashon di e artíkulo akí òf artíkulo ayá.Isaías 64:8; Yeremías 18:4-6; Sirag 33:13; Romanonan 9:21

8Despues, ku un esfuerso for di lugá, e ta modelá for di e mesun klei un dios falsu; esei un hende ta traha, un hende ku ayera mes a nase for di tera i ku pronto lo bai bèk den e tera for di unda a sak'é, ora e mester entregá e bida ku el a haña fia.

9No ta import'é ku su bida ta asina kòrtiku ni ku e mester muri pronto, nò, e ta kompetí ku platénan i imitá esnan ku ta traha ku bròns i ta konsiderá trahamentu di kos falsu un honor.

10Ta na poko shinishi e ta pega su kurason, un tiki tera ta e suèldu ku e ta spera i di ménos balor ku klei ta su bida.Isaías 44:20

11Pasobra e no ta rekonosé Dios ku a model'é, ku a supla rosea di bida den dje i ku a dun'é inspirashon pa su trabou.Génesis 2:7

12Pero e trahadó di wea ta kere ku bida ta un sorto di wega, un feria pa hasi ganashi, pasobra su regla básiko ta: Mester saka probecho for di tur kos, asta for di maldat.

13E hòmber akí, ku for di e mesun klei ta krea kos di kibra i dios falsu, sa mihó ku kualke hende ku e ta hasi maldat.

Eror di e egipsionan

14Pero esnan ku mas tabata falta inteligensia i ku tabata pió ku mucha sin tinu tabata e enemigunan ku a oprimí bo pueblo,

15pasobra asta nan a tuma tur e diosnan falsu di e sobrá pueblonan pa nan dios. Diosnan ku tin wowo ma no por mira, ku tin nanishi ma no por hole, ku tin orea ma no por tende, ku tin dede ma no por mishi, ku tin pia ma no por kana,Salmonan 115:5-7; 135:15-17

16ku hende a traha, ku ta formá dor di un ser ku a haña bida fia. Ningun hende no ta kapas na traha un dios ku ta su pareu.

17Komo e ta mortal, su mannan pekadó ta traha solamente kosnan sin bida; e mes bal mas ku e ophetonan ku e ta adorá, pasobra sikiera e ta bibu, i e diosnan no.

18E egipsionan ta adorá ademas e bestianan di mas repugnante, ku, kompará ku tur sobrá, ta resultá di ta esunnan di mas estúpido.

19Nan no tin nada bunita ku ta hasi nan atraktivo manera e otro bestianan; nan ta bestia ku no a haña aprobashon ni bendishon di Dios.