Salmo 144 - Papiamentu Bible with DC 2013(PBDC13)

SALMO 144Felis ta e pueblo ku tin SEÑOR pa nan DiosDi David.

1Bendishoná sea SEÑOR, nos baranka,

ku a trein mi mannan pa bataya

i mi dedenan den uso di arma;

2E ta mi aliado, mi fòrti,

mi baluarte, Esun ku ta libra mi,

mi eskudo tras di kual mi ta sigur,

El a someté mi pueblo na mi.

3Kiko hende ta pa Bo, SEÑOR,

yu di hende pa Bo paga tinu n'e?

4Hende ta parse un rosea,

su dianan, un sombra ku ta pasa.

5SEÑOR, habri bo shelu i baha,

toka serunan i hasi nan huma.

6Manda welek i plama e enemigunan,

tira bo flechanan i pone nan hui.

7Saka bo man for di ariba i salba mi,

laman ta yena, saka mi fo'i dje,

libra mi for di gara di strañeronan,

8kende nan boka ta blo saka mentira

i ku ta hisa man pa hura falsu.

9Mi ke kanta un kanto nobo pa Bo, Dios,

mi ke toka siter i kanta pa Bo.

10Bo ta duna reinan viktoria

i ta libra David, bo sirbidó:

salba mi tambe di e spada mortal,

11libra mi for di gara di strañeronan,

kende nan boka ta saka blo mentira

i ku ta hisa man pa hura falsu.

12Ku nos yu hòmbernan por ta manera planchi,

bon kriá den nan ten di hubentut;

nos yu muhénan manera kolumnanan,

bon akabá pa dòrna un palasio;

13nos mangasinanan yen di provishon,

dunando tur sorto di alimento;

nos karnénan sea mil be kargá,

laga nan rende den kunuku

i bira mas ku dies mil;

14nos bakanan sea bon kargá;

no mas buraku den muraya, ni destiero,

no mas gritu di ansha den nos kayanan.

15Felis e nashon ku ta asina pará,

felis e pueblo ku su Dios ta SEÑOR!