Ezekiel 35 - Papiamentu Bible with DC 2013(PBDC13)

Profesia kontra Edom

1SEÑOR a dirigí palabra na mi:

2‘Hende, wak den direkshon di e serunan di SeírIsaías 34:5-17; 63:1-6; Yeremías 49:7-22; Ezekiel 25:12-14; Amos 1:11-12; Abdías 1-14; Malakías 1:2-5 i aktua komo profeta kontra esnan ku ta biba aya.

3Bisa nan: Esaki ta loke SEÑOR, mi Dios, ta bisa: Serunan di Seír, Mi ta lanta kontra boso. Lo Mi kastigá boso pisá i hasi di boso un desierto, un mondi.

4Di bo siudatnan Mi ta hasi un ruina. No ta sobra nada mas ku un desierto. E ora ei boso lo rekonosé ku t'Ami ta SEÑOR.

5For di ántes boso tabata enemigu di e israelitanan i boso a entregá nan na morto ku spada den tempu di nan desgrasia, tempu tabata kastigá nan pa nan pikánan.

6P'esei, mes sigur ku Mi ta Dios bibu,’ SEÑOR, mi Dios ta bisa, ‘lo Mi drama boso sanger; morto lo persiguí boso. Pasobra boso no a repudiá dramamentu di sanger, morto lo persiguí boso.

7Lo Mi hasi di serunan di Seír un desierto, un mondi, i kaba ku tur hende ku bini einan òf pasa einan.

8E serunan einan lo ta tapá ku kadaver; tur kaminda esnan matá ku spada lo ta bentá: riba serunan, den vayenan, den roinan.

9Mi ta hasi bo pa semper un desierto. Bo siudatnan lo no ta habitá mas. E ora ei boso lo rekonosé ku t'Ami ta SEÑOR.

10Boso a bisa: “E pais di e dos pueblonan ei, Israel i Huda, awor ta di nos, nos ta bai tum'é pa nos,” ounke Mi tabata biba einan.

11P'esei, mes sigur ku Mi ta Dios bibu,’ SEÑOR, mi Dios, ta bisa, ‘lo Mi trata boso ku mesun rabia, envidia i odio ku boso a trata nan kuné. Lo Mi laga nan ripará ken Mi ta ora Mi kastigá boso.

12Boso lo rekonosé ku Ami, SEÑOR, a tende e palabranan ofensivo ku boso a papia di e serunan di Israel, ora boso a bisa: “Nan ta bandoná, a duna nos nan pa nos probechá di nan!”

13Bo a habri asina un boka kontra Mi i hasi bo kulpabel dor di usa palabra grandi kontra Mi. Mi a tende esei.’

14Esaki ta loke SEÑOR, mi Dios, ta bisa: ‘Lo Mi hasi un desierto di bo i henter mundu lo ta kontentu,

15meskos ku abo tabata kontentu dia a destruí pais di e pueblo Israel. Mi ta bai hasi di bo tambe un desierto. Serunan di Seír, henter Edom, ta bira un desierto. I nan lo rekonosé ku t'Ami ta SEÑOR.’