Salmo 50 - Papiamentu Bible with DC 2013(PBDC13)

SALMO 50Adorá Dios ku kurason sinseroSalmo di Asaf.

1Dios di diosnan, SEÑOR, ta papia,

ta yama mundu for di ost te wèst.

2Dios ta resplandesé for di Sion,

e siudat di perfekto bunitesa.

3Nos Dios ta bini, lo E no keda ketu;

dilant'i djE tin un kandela golos,

rònt di djE un tempestat violento.

4E ta grita bisa shelu ayariba

i tera, pa nan husga su pueblo:

5‘Trese tur mi fielnan huntu pa Mi,

nan ku a sera e Aliansa ku Mi,

ofresiendo sakrifisionan na Mi.’

6Shelu ta anunsiá ku E ta hustu,

ku Dios, E mes, ta bin husga.

7‘Skucha, mi pueblo, pa Mi papia ku bo

i testiguá kontra bo, Israel!

Ta Dios, bo Dios, Mi ta!

8Mi no ta kritiká bo sakrifisionan,

pasobra Bo ta presentá Mi tur dia

bo animalnan, kimá riba altá.

9Ma Mi no ke ningun toro fo'i bo stal,

ni chubatu for di bo kurá,

10komo tur bestia di mondi ta di Mi,

e míles di animalnan den mi serunan.

11Mi konosé kada para den laria,

loke ta move den kunuku ta di Mi.

12Si akaso Mi tabatin hamber,

sigur lo Mi no a bisa bo,

pasobra Ami ta doño di tera

i di tur loke tin riba dje.

13Ami kome karni di toro?

Ami bebe sanger di chubatu?

14Laga alabansa ta bo ofrenda na Dios.

Si bo a hasi un promesa na Altísimo,

mira pa bo kumpli kuné.

15Si e ora ei bo yama Mi den apuro,

lo Mi libra bo i abo lo honra Mi.’

16Ma Dios ta bisa pekadó asin'akí:

‘Ki mishi bo resitá mi mandamentunan

i semper tuma mi aliansa den boka,

17si bo no gusta pa Ami koregí bo

i bo n' ta hisa mi palabranan fo'i suela?

18Kualke ladron ku bo topa ta bo amigu,

bo ta sinti bo na kas den kompania

di hende ku sa kibra matrimonio.

19Bo a hasi mal uso di bo boka

i bo lenga ta blo saka mentira.

20Bo ta sinta makistá bo mes ruman,

ta kalumniá yu di bo mama.

21Eseinan ta loke bo a hasi,

anto Ami lo mester keda ketu?

Bo ta kere ku Mi ta manera bo?

Lo Mi keha bo, konfrontá bo ku tur kos.

22Komprondé e kos ei bon, boso tur,

ku ta lubidá riba Dios,

sino Mi ta sker boso na wèrki

i lo n' tin hende pa salba boso.

23Ken ku ofresé alabansa ta honra Mi,

un hende asina ta habri kaminda

pa Mi mustr'é salbashon di Dios.’