Predikador 4 - Papiamentu Bible with DC 2013(PBDC13)

Opreshon, matamentu di kurpa i soledat

1Despues mi a dirigí mi atenshon riba e aktonan di opreshon ku hende ta kometé den e mundu akí.

I mi a mira hende oprimí yora,

pero no tin hende pa konsolá nan;

nan opresornan ta trata nan ku violensia,

pero no tin hende pa konsolá nan.

2P'esei mi a haña ku esnan ku a muri,

ta mas felis ku esnan ku ta na bida ainda.

3Pero mas felis ta esun ku nunka no a nase;

nunka e no tabatin nada di aber

ku tur e mizeria di e bida akí.

4Mi a ripará tambe ku hende ta mata kurpa i ke logra ku éksito únikamente, pasobra e ta yalurs riba otro hende. Esei tambe ta ilushon, hungamentu di kore kue ku bientu.

5Ta bèrdat:

hende bobo ta sinta man krusá

i destruí su mes.

6Pero tòg:

preferibel poko trankilidat,

ku hopi matament'i kurpa i biba anshá.

7-8Tambe mi a mira un otro ilushon:

un hende ku tabata kompletamente so,

e no tabatin yu,

asta e no tabatin famia.

Tòg e no a stòp di mata kurpa i preokupá,

nunka e no tabata satisfecho ku su rikesa.

E tabata puntra su mes:

‘Ma ta pa ken mi ta mata kurpa

i keda sin pèrmití mi mes plaser?’

Esei tambe ta ilushon i kos di desaprobá.

9Preferibel dos hende huntu, ku un hende so,

pasobra huntu nan ta gosa mas di nan trabou.

10I si un di nan dos kai,

e otro ta yud'é lanta.

Pero malu pa esun ku kai ora e ta so,

pasobra no tin niun hende pa yud'é lanta.

11Si boso dos drumi huntu,

boso ta duna otro kalor;

un hende so ta sinti friu.

12Por dominá ún hende,

pero dos hende lo por duna resistensia.

Ademas un kabuya iflèktu tres bia no ta kibra fásilmente.

Promoshon ta ilushon

13Preferibel un mucha hòmber pober, pero inteligente, ku un rei bieu i bobo ku no ta tuma konseho di otro hende.

14Mi ta kòrda riba un hende ku despues di a pasa un tempu den prizòn a bira rei di e pais kaminda el a nase pober.

15Mi a ripará ku henter mundu tabata sigui e hóben, e susesor di rei.

16No tabatin ún hende ku no ker a bai oudiensia serka e rei hóben. Pero esnan ku a bini despues no tabata gusta e susesor mashá. Esaki tambe ta ilushon i hungamentu di kore kue ku bientu.