1Moab, manda un par di lamchi di karné komo tributo pa soberano dje pais. Laga nan sali for di Sèla, krusa desierto i bini seru di Sion.
2Mester bisa e soberano:
‘Muhénan di Moab ta manera para pushá fo'i nan nèshi.
Na e lugánan pa krusa riu di Arnon
nan ta kore bai bini pa loko.
3Duna nos un solushon,
tuma un desishon!
Protegé e fugitivonan,
no laga e refugiadonan ta deskubrí!
Protegé nan di dia kla
manera anochi ta tapa tur kos ku su sombra.
4Tuma refugiadonan di Moab komo bo invitadonan,
ofresé nan un lugá pa nan skonde
di esun ku ta persiguí nan.’
Ora e tirania pasa
i yega un fin na e destrukshon,
ora e opresor sali for di e pais,
5un trono lo ta lantá
riba fundeshi di solidaridat.
Unu for di desendensia di David lo sinta riba dje,
unu ku ta fiel,
unu ku na ora di husga
ta rekonosé derecho
i ta boga pa hustisia.
Tristesa pa Moab6Nos a tende di orguyo di Moab,
di su arogansia sin fin,
pero su bromamentu a resultá skuma so.
7Awor moabitanan ta keha di nan suerte,
nan ta kana tur kaminda ta yora malai;
kompletamente abatí,
nan ta eilu p'e bolonan di drùif di Kir-Haresèt.
8Moab ta yora malai
pasobra kunukunan di Hèshbon a seka,
mata di wendrùif di Sibma a marchitá.
Poderosonan di pueblonan a trapa
e matanan di mas kostoso.
Un ten nan rankanan tabata kore te Yazer,
drenta den desierto
i plama bai te yega Laman Morto.
9P'esei mi ta yora huntu ku Yazer
p'e matanan di wendrùif di Sibma.
Mi wowo ta yena ku awa pa boso,
Hèshbon i Elalé,
pasobra ora di piki fruta,
tempu di kosechá drùif,
no tin gritu di alegria mas.
10Tur kantamentu kontentu den hòfinan
a bira silensio.
No tin gritu ni alegria den kunuku di wendrùif.
No ta traha biña mas
den bak'i machiká wendrùif.
Tur gritu di kontentu a muri bai.
11Mi ta tembla manera kuèrdènan di arpa,
dje tantu ei mi hemut ta yena pa Moab
i mi kurason ta kibra pa Kir-Haresèt.
12Maske kuantu Moab kansa su kurpa
subi seritunan di sakrifisio,
bai su santuarionan pa resa,
ta tantu bal!
13Esaki ta e palabranan ku SEÑOR a yega di papia tokante Moab.
14Pero awor E ta bisa asin'akí: ‘Denter di tres aña, sin kita sin pone, ni hendenan prominente di Moab, ni e masa grandi lo no nifiká gran kos, pasobra ta un par, djis un grupito mizerabel so, lo keda.’
Who We AreWhat We EelieveWhat We Do
2025 by iamachristian.org,Inc All rights reserved.
