Salmo 38 - Papiamentu Bible with DC 2013(PBDC13)

SALMO 38Kulpabel, enfermo i soMi ta malu, SEÑOR! Kura mi i pordoná miSalmo di David. Na un sakrifisio konmemorativo.

1SEÑOR, no kastigá mi den bo rabia,

ai, no suta mi den bo furia!

2Bo flechanan a pega den mi kurpa,

bo man a kai pisá riba mi.

3No tin parti sin herida na mi kurpa,

pa motibu di bo ira kontra mi;

no a keda mi ningun wesu sano

despues ku mi a hasi piká.

4Mi kulpa a subi pasa riba mi kabes,

manera un peso fuera di mi forsa.

5Mi heridanan ta hole i ta putri,

debí na mi lokura.

6Mi ta kana doblá, kabes abou,

henter dia mi ta kana na luto.

7Mi sintura ta kima di keintura

no a sobra mi ningun parti hinté.

8Mi kurpa ta kibrá i rendí,

mi ta grita yora di doló,

di tantu batiment'i kurason.

9Señor, Bo konosé tur mi anhelo,

Bo no ta ignorá mi kehonan.

10Mi kurason ta bati, forsa a bai,

asta lus di mi wowo a kita.

11Mi amigunan i mi konosínan

ta keda para leu for di mi plaga,

mi famia ta keda na un distansia.

12Esnan ku ke kita mi bida

a pone un trampa pa mi;

esnan ku ke mi malu tur ta bisa

ku nan ke kousa mi un desgrasia,

henter dia nan ta plania traishon.

13Ma mi ta hasi surdu, mi n' ke tende,

manera un muda mi n' ta habri mi boka.

14Mi ta manera un hende ku n' ta tende,

un hende sin defensa na su boka.

15Tur mi speransa, SEÑOR, ta den Bo,

den bo kontesta, mi Señor i mi Dios.

16Mi ta pensa: No laga nan hari mi

ni kanta gloria, si mi trompeká.

17Pasobra mi ta serka di kai,

mi pena ta mi úniko kompaño.

18Mi ke konfesá mi kulpa,

mi ta flihí debí na mi piká.

19Mi enemigunan ta bibu, poderoso,

hopi ta esnan ku ta odia mi mal odiá,

20ku ta paga bondat ku maldat

i ku atake mi afan pa hasi bon.

21No bandoná mi, SEÑOR,

mi Dios, no keda leu fo'i mi!

22Hasi lihé, bin yuda mi,

mi Señor, mi salbashon!