Sabiduria 9 - Papiamentu Bible with DC 2013(PBDC13)

Salomon ta resa pidi sabiduria

1Dios di mi grandinan, Señor di piedat,

ku pa medio di bo palabra a krea tur kos

2i ku saber a traha hende di tal forma,

ku e por manda riba tur bo kriaturanan,

3goberná mundu ku santidat i hustisia,

i dikta sentensia ku un konsenshi sinsero:

4duna mi e sabiduria ku ken Bo ta kompartí bo trono;

no nenga mi un lugá entre bo yunan.

5Pasobra mi ta bo sirbidó, yu di bo sirbiente,

un hende débil ku no ta biba largu

i ku falta komprondementu pa derechi i lei.

6Pa perfekto k'un yu 'i mama por ta,

kiko e ta bal si e no tin bó sabiduria?

7Abo ku a skohe mi komo rei di bo pueblo

i komo hues di bo yunan hòmber i muhé,

8a ordená mi konstruí riba bo seru santu un tèmpel

i den e siudat kaminda Bo ta biba

un altá, semehante na e tènt sagrado

ku Bo a prepará for di un prinsipio.

9Serka Bo ta keda e sabiduria

ku konosé tur obra di bo man

i ku ora Bo a traha mundu

tabata presente banda di Bo;

e sa kiko ta agradabel den bo bista

i kiko ta segun bo mandamentunan.

10Mand'é for di shelu sagrado,

bis'é baha fo'i bo trono glorioso,

p'e kompañá mi i obra den mi

i siña mi kiko ta agradá Bo.

11Komo ku e sa i ta komprondé tur kos,

l'e guia mi ku prudensia den tur mi aktuashonnan.

Su splendor lo protegé mi kontra piká,

12e ora ei mi obranan lo ta na bo agrado,

lo mi goberná bo pueblo ku hustisia

i ta digno di e trono di mi tata.

13Kon hende por sa intenshonnan di Dios!

Ken por komprondé boluntat di Señor!

14Hende su manera di pensa ta insigur;

su manera di rasoná ta yen di duda.

15Kurpa mortal ta un peso pa alma,

apego na mundu ta forma un strobamentu

pa mente di hende ku su mil pensamentu.

16Apénas nos por kapta tur kos na mundu,

i ta duru pa komprondé asta e kos di mas simpel:

kòrda kosnan di shelu, ta ken por deskubrí nan?

17Ta ken lo por konosé bo boluntat, o Dios,

si Abo mes no duna sabiduria

i no manda bo spiritu santu for di ariba?

18T'Asina so esnan na mundu por kohe bon kaminda

i siña loke ta agradabel den bo bista

i keda salbá pa via di sabiduria.