Barug 5 - Papiamentu Bible with DC 2013(PBDC13)

1Herusalèm, kita bo paña di mizeria i rou,

bisti mahestat di Dios su gloria pa semper.

2Lora bo kurpa den su mantel di hustisia,

koroná bo kabes ku splendor di Esun Eterno.

3Pasobra Dios ta bai mustra tur nashon

ku ta biba bou di shelu bo gloria radiante.

4Esaki ta e nòmber, ku pa semper l'E duna bo:

‘Pas di Hustisia, Splendor di Santidat.’

5Herusalèm, lanta, bai para riba seru,

bira bo kara pariba i mira

bo yunan ta bini di pariba i pabou,

reuní riba òrdu di Dios Santu,

kontentu di mira ku Dios a kòrda riba nan!

6Un ten nan a sali na pia bai laga bo,

hibá fo'i tera p'un eskolta enemigu.

Awor Dios ta trese nan kas serka bo,

hisá na laria, manera un rei riba trono.

7Dios a ordená pa baha

kada seru altu i eterno,

yena vayenan i paria suela,

pa Israel pasa trankilamente,

guiá pa gloria di Dios.

8Asta mondi- i palunan di dushi holó

lo duna Israel sombra riba òrdu di Dios.

9Dios mes lo trese su pueblo kas;

nan lo kana yen di alegria den lus di su gloria,

kompañá pa su mizerikòrdia bondadoso.