Sirag 36 - Papiamentu Bible with DC 2013(PBDC13)

Orashon pa yuda Israel lihé

1Piedat di nos, Dios di universo;

wak abou i hinka spantu den tur nashon.

2Hisa bo man kontra pueblonan pagano

i laga nan mira bo poder.

3Manera nan a mira bo santidat entre nos,

laga nos mira bo grandesa tambe den nan;

4laga nan siña manera nos a siña

ku no tin otro Dios sino Abo so, Señor.

5Ripití bo señalnan, hasi otro milager,

demostrá gloriosamente forsa di bo brasa i bo man drechi.

6Lanta bo ira i basha bo rabia,

kita atversario fo'i kaminda i kaba ku enemigu.

7Laga e tempu ku Abo a destiná

pa manifestá bo huramentu yega pronto,

pa tur kaminda nan papia di bo gran echonan.

8Destruí e sobrebibientenan ku kandela di bo rabia;

ku esnan ku maltratá bo pueblo kai den pèrdishon.

9Plèchè kabes di e gobernadornan enemigu,

ku ta bisa: ‘Ta nos so t'ei.’

10Bolbe reuní tur tribu di Yakob,

debolbé nan nan herensia manera tabata ántes.

11Tene piedat, Señor, di e pueblo ku ta karga bo nòmber,

tene piedat di Israel ku Bo a igualá na un yu mayó.

12Mustra kompashon ku e siudat ku tin bo tèmpel,

ku Herusalèm, bo lugá di sosiegu.

13Yena Sion ku alabansa di bo fama,

yena bo pueblo ku bo gloria.

14Bo mes a krea nan na prinsipio; rekonosé nan awor

i laga e profesianan, bisá den bo nòmber, sali.

15Rekompensá esnan ku ta konfia den Bo

i laga bo profetanan resultá digno di konfiansa.

16O Señor, skucha orashon di esnan ku ta sirbi Bo,

segun Aaron su bendishon riba bo pueblo,

17pa tur esnan ku ta biba riba mundu sa

ku Abo ta Señor, Dios eterno.

Siña distinguí (kontinuashon)

18Stoma por tuma tur kuminda,

tòg esun kuminda ta mas dushi ku e otro.

19Ta shel'i boka ta distinguí smak di kuminda,

sintí ta distinguí mentira for di bèrdat.

20Un hende di mala fe semper bai ta forma tròbel,

pero un hende alerta ta pag'é bèk dòbel.

Skohe e mihó esposa

21Pa un muhé kua hòmber ku ta ta bon,

pero pa un hòmber esun muhé ta mihó ku e otro.

22Bunitesa di un muhé ta pone kara di su kasá bria

i surpasá tur kos ku su wowo por deseá,

23i si ademas e ta papia suave i kalmu,

su kasá a gana premio mayó.

24Esun ku haña un bon esposa, a haña e tesoro di mas grandi,

un yudansa igual n'e, un sosten fuerte.

25Un hòfi di wendrùif habrí,

bestianan ta kom'é hasié limpi limpi.

Un hòmber sin kasá ta dualu tristu rònt riba mundu.

26Ken ta konfia un trupa di sòldá

ku ta bai di un siudat pa otro?

27Asina niun hende no ke tin nada di hasi

ku un hòmber sin paradero,

ku ta kai drumi kaminda nochi sorprend'é.