Salmo 85 - Papiamentu Bible with DC 2013(PBDC13)

SALMO 85Bolbe bin biba meimei di bo pueblo i dun'é pas, SEÑORPa maestro di kanto. Di yunan di Korag. Salmo.

1SEÑOR, Bo tabata bon pa bo tera,

B'a trese kambio den suerte di Yakob.

2B'a pordoná kulpa di bo pueblo,

B'a tapa tur su pikánan.

3B'a guli tur bo rabia manda abou,

B'a frena e kandela di bo furia.

4Dios, nos Salbador, restourá nos,

no keda disgustá ku nos mas.

5Bo ta bai keda pa semper indigná,

ta sigui rabia ku nos sin fin?

6Bo n' por laga nos biba un bida nobo,

pa bo pueblo bolbe legra den Bo?

7SEÑOR, mustra nos bo amor

i duna nos bo salbashon!

8Mi ke skucha Dios-SEÑOR su palabra:

‘Pas!’ esei ta su mensahe

pa su pueblo, pa tur ku ta su fielnan,

kontal ku nan no bolbe hasi bobedat.

9Salbashon ya ta serka su fielnan,

su gloria ta bin biba den nos tera:

10amor i bèrdat lo topa,

hustisia i pas lo brasa otro;

11bèrdat lo brota for di tera

i hustisia mira abou for di shelu.

12Ademas SEÑOR lo duna bonansa

i nos tera lo duna kosecha.

13Hustisia lo marcha su dilanti

i lo habri kaminda pa su pasonan.