Job 36 - Papiamentu Bible with DC 2013(PBDC13)

Diskurso final di ElihuElihu ta laga bèrdat tokante Dios sali na kla

1Elihu a sigui papia:

2‘Karga un poko pasenshi

i lo mi instruí bo,

pasobra ainda m'a sobra argumento

na Dios su fabor.

3Mi ta bai usa mi konosementu amplio

pa demostrá ku mi Kreador tin rason.

4Bo dilanti bo tin un hòmber,

den konosementu hopi vèrsá.

Nada mi no ta inventá,

esei ta sigur!

Dios ta hustu i p'esei hende ta sufri

5Dios ta poderoso,

pero E no tin menospresio di nada

no tin nada ku E no ta komprondé.

6E no ta laga hende malbado na bida

i hende oprimí E ta trata ku hustisia.

7Hende hustu E ta protegé,

hasi nan poderoso manera rei

i laga nan haña honor pa semper.

8Pero ora hende no tin salida mas,

nan keda changá den nan propio mizeria,

9Dios ta laga nan realisá e malu ku nan a hasi

i e manera ku nan a laga orguyo dominá nan.

10E ta hala nan atenshon riba su atvertensianan

i ta mustra nan ku nan mester arepentí di nan pikánan.

11Si nan obedesé i sirbi Dios,

nan lo hiba un bida di pas i prosperidat.

12Pero si nan no hasi esei,

nan lo muri pa motibu di ignoransia

i nan lo krusa e riu ku ta hiba nan reino di morto.

13Hende malbado ta keda ku nan rabia

i maske kastigá nan,

nan no ta resa pidi yudansa.

14Nan ta muri den flor di nan hubentut;

nan bida ta kaba na un manera bergonsoso.

15Dios ta usa sufrimentu di hende pa salba nan;

pa medio di doló

E ta pone nan haña komprondementu.

Elihu ta atvertí Job ku lo e haña e kastigu meresí

16Asina tambe Dios lo libra bo

fo'i den bok'i kolebra;

na lugá di sinti bo anshá,

lo bo por hala rosea grandi;

bo mesa lo ta yen di kuminda

antó pas lo reina.

17Pero awor bo ta haña tur e kastigu

ku otro hende malbado tambe ta haña,

Dios a kondená bo pa sufri

i lo bo no skapa e kastigu,

ku E ta duna bo.

18Paga tinu pa bo no laga plaka gaña bo

ni no laga sèn bou 'i mesa korumpí bo.

19Bo rikesa no ta sirbi bo pa nada;

tur bo influensianan no por yuda bo den e kaso akí.

20No anhelá pa nochi sera,

e tempu ku nashonnan lo disparsé diripiente, yega.

21Tene kuidou, no bira kara pa maldat,

bo a pasa den sufrimentu

pa esei tene bo leu for di maldat.

Elihu ta pidi Job pa kòrda kon grandi Dios ta

22Kòrda bon,

kon sublime Dios su poder ta!

Ken ta un maestro manera E?

23Ken por bisa Dios loke E tin ku hasi?

Ken por bis'É:

“Bo a hasi malu?”

24Hende semper a kanta su alabansa.

Kòrda p'abo tambe alab'É

pa loke El a hasi!

25Tur hende a mira Dios su obranan,

maske ta djaleu.

Elihu ta deskribí kon Dios ta obra den tormenta

26Sí, Dios ta grandi,

nos no tin un idea kon grandi E ta;

nos no por kalkulá su edat.

27E ta hala gota di awa trese shelu

i ta laga nan evaporá, bira áwaseru.

28E ta laga awa basha for di nubianan

i serena drep riba humanidat.

29Ken ta komprondé kon nubianan ta move

i kon bos ta grita for di su kas selestial?

30E ta laga rayonan di welek kòrta den shelu,

pero fondo di laman ta keda skur.

31Pa medio di áwaseru i kandela di welek

Dios ta husga pueblonan,

pero ta duna kuminda na abundansia tambe.

32E ta kohe e welek tene den su man

i lag'é raka kaminda E mek e.

33Ora hende tende bos zona

nan sa ku un tormenta ta aserkando,

bestianan tambe ta anunsiá mal tempu.