Yoel 3 - Papiamentu Bible with DC 2013(PBDC13)

SEÑOR ta kastigá enemigunan di su pueblo

1‘Den e tempu ei

Mi ta trese kambio den suerte di Huda, di Herusalèm.

2Mi ta reuní tur pueblo

i hiba nan vaye di Yoshafat.

Aya lo Mi husga nan

debí na tur loke nan a hasi ku mi pueblo,

ku Israel, mi propiedat;

nan a stroi e bou di pueblonan.

Nan a dividí mi pueblo

3i nan ku nan a parti mi pueblo dor di tira lòt.

Nan a troka mucha hòmber pa prostituta,

mucha muhé pa biña.

4Boso, siudatnan Tiro i Sidon,

i boso, regionnan di Filistea,

kiko boso ke di Mi?

Vengansa boso ke tuma riba Mi?

Si ta esei ta boso intenshon,

lo Mi paga boso inmediatamente pa e kos ei.

5Mi oro i plata boso a kohe bai kuné,

boso a lastra mi tesoronan presioso

hiba boso tèmpelnan.

6E habitantenan di Herusalèm,

e poblashon di Huda,

boso a bende ku griegonan.

Boso a bai ku nan

leu for di nan mes pais.

7Pero Ami, Mi ta buska nan bèk

for di e lugá, kaminda boso a hiba nan i bende nan,

i boso lo sufri mesun daño

ku boso a hasi nan.

8Mi ta laga pueblo di Huda bende boso yunan:

nan lo bende nan ku e sabeonan,

un pueblo leu for di aki.

Ami, SEÑOR, a bisa asina.’

9Señor ta bisa:

‘Bisa e pueblonan lo siguiente:

Prepará boso pa guera,

yama boso hòmbernan balente;

laga tur sòldá presentá i ranka sali!

10Dirti boso chapinan traha spada ku nan,

dirti boso kuchúnan di snui traha lansa ku nan.

Asta esun débil mester bisa:

“Mi ta un sòldá balente!”

11Bini lihé, pueblonan bisiña,

bini huntu.’

I Abo, SEÑOR,

laga bo ehérsito baha bai ayanan!

12SEÑOR ta bisa:

‘Laga e pueblonan presentá

i ranka sali bai vaye di Yoshafat,

pasobra aya lo Mi sinta

pa husga tur pueblo bisiña.

13Nan maldat ta grandi;

kohe boso machete,

ta tempu pa kosechá;

machiká wendrùif,

pasobra e bakinan ta yen,

te ta basha afó

di tur maldat.’

14Multitut i mas multitut,

aya den vaye di huisio,

pasobra e dia,

ku SEÑOR lo husga den vaye, ta aserká.

15Solo i luna ta bira skur,

i streanan ta pèrdè nan splendor.

16SEÑOR ta grita manera un leon for di seru di Sion,

for di Herusalèm su stèm ta ronka manera bos:

shelu i tera ta tembla.

Pero pa su pueblo E ta un refugio,

E ta protegé e israelitanan.

17Señor ta bisa:

‘E ora ei boso lo rekonosé

ku Ami, SEÑOR, ta boso Dios.

Lo Mi biba riba Sion, mi seru santu.

E ora ei Herusalèm lo ta santu,

niun strañero no ta drenta mas.

18Den e tempu ei

biña lo lèk for di e serunan,

lechi lo kore for di e seritunan.

Roinan di Huda ta zona,

den tèmpel di SEÑOR un bròn ta kuminsá brota

i muha henter vaye di Akasia.

19Egipto ta bira un desierto,

Edom un region seku i bashí,

pasobra nan a usa violensia kontra Huda

i drama sanger di hende inosente den nan pais.

20-21Asina Mi ta venga e sanger ei,

asina Mi ta kastigá e kulpabelnan.

Pero na Huda semper lo tin hende ta biba,

nunka mas Herusalèm lo no keda destruí.

Ami, SEÑOR, lo biba riba seru di Sion.’