Proverbionan 7 - Papiamentu Bible with DC 2013(PBDC13)

1Mi yu, obedesé mi palabranan,

keda kòrda mi mandamentunan.

2Hasi loke mi ta manda bo i lo bo biba;

hasi mi enseñansa bo tesoro di mas presioso.

3Mara nan na bo renchi,

graba nan den bo kurason.

4Bisa sabiduria: ‘Bo ta manera mi ruman muhé’

i yama ‘komprenshon’ bo famia mas yegá.

5Sabiduria i komprenshon ta libra bo di e muhé ku no ta fiel na su esposo,

maske kuantu e trastia bo.

6Un dia mi tabata para wak

dor di e tralinan di mi bentana.

7Mi a mira algun hòmber hóben sin eksperensia

i mi a ripará ún ku no a usa su sintí.

8El a kana den e kaya,

bai na e skina kaminda e muhé ta biba,

rumbo pa kas di e muhé.

9Tabata tardesitu kaba, solo a baha

i skuridat a drenta.

10Ata e muhé ta sali bin top'é,

bistí manera un muhé di bida

ku un yangá provokativo.

11Un muhé lawai i pa su kuenta

ku ta bati kaya di dia i anochi.

12Si e no ta riba kaya e ta den parke,

i na kada skina e ta para i purba sedusí.

13E ta kohe e hóben tene, sunchi e

i bis'é sin niun klase di bèrgwensa:

14‘Mi a primintí sakrifisionan di pas,

i awe mi a kumpli ku mi promesanan.

15P'esei mi a sali bin topa bo,

mi a buska bo ansiosamente i mi a haña bo.

16Mi a drecha mi kama bunita

ku un sobrekama di lenen di Egipto.

17Mi a perfumá mi kama

ku holó di mira, áloe i kané.

18Bini, ban bira burachi di amor,

ban gosa te ora di dia habri.

19Bini no, e hòmber n' t'ei,

el a sali di biahe bai leu.

20El a bai ku hopi plaka,

ta te dia luna ta yen e ta bini bèk.’

21E muhé ta papi'é ku boka dushi

te ku e hóben a keda konvensí.

22Sin pèrdè pa gana el a sigui e muhé,

manera un baka ku ta bai plenchi,

manera un biná ku ta bula bula drenta un trampa,

23manera un para e ta bula drenta den un kui,

sin sa ku su bida ta na peliger,

te ora un flecha bora drenta te den e parti mas profundo di su ser.

24P'esei, mi yunan, tende di mi,

i paga tinu na mi palabranan.

25No laga un muhé asina hinka bo den tentashon,

no lag'é trèk bo bai kuné.

26Hopi ta esnan ku a bira su víktima,

mashá hopi esnan ku el a mata.

27Su kas ta port'i dilanti di reino di morto,

ei bo ta kuminsá muri.