Sirag 43 - Papiamentu Bible with DC 2013(PBDC13)

Elogio di naturalesa

1Esta bunita i kla shelu ta!

Esta un espektákulo grandioso firmamentu ta!

2Solo ta mana splendor na su salida:

esta formidabel e obra ei di Altísimo ta!

3Mèrdia e ta kima tera.

Ken por resistí su kalor?

4Esun ku ta waya kandela di fòrnu

tin trabou duru den kayente;

tres be mas kayente e solo

ku ta tosta serunan ta;

e ta supla roseanan kayente,

blèndu wowo ku su rayonan fuerte.

5Grandi ta Señor ku a trah'é,

riba su òrdu e ta pura sigui su rumbo.

6I luna tambe: ku su fasenan

e ta indiká tempu i temporada.

7Luna ta fiha fiestanan;

un lus ku ta mengua te ora e disparsé.

8Lunanan di aña ta karga su nòmber.

Esta bunita ora e ta mengua i krese atrobe.

Luna, bandera di ehérsitonan den altura,

ku ta lusi na firmamentu di shelu.

9Splendor di strea ta bunitesa di shelu,

adorno di lus den altura di Señor:

10riba òrdu di Esun Santu nan ta tuma posishon,

nan no ta kansa na nan mes lugá.

11Wak e arko íris i bendishoná su Kreador!

E ta mashá mashá bunita den su splendor.

12E ta marka un bog splendoroso na shelu;

man di Altísimo a span e.

13Señor ta ordená i yag sneu manda abou,

welek ta kòrta i kumpli ku su veredikto.

14Ku e mesun meta ta habri porta di mangasina

i nubia ta bula sali manera para.

15Den su grandesa E ta hasi nubia duru

i pipita di eis ta kita kai for di nan.

16-17Stèm di su bos ta pone mundu tembla,

su dilanti serunan ta tambaliá;

pa su boluntat tempestat di sur,

orkan di nort i warwarú ta asotá mundu.

18Manera para ku ta bula bini abou E ta stroi sneu;

sneu ta kai manera dalakochi ta baha riba tera.

Su bunitesa blanku ta asombrá bista di hende

i alegrá kurason ora e ta kai.

19Tambe E ta stroi puiru di eis manera salu riba mundu:

di fris e ta bira skèrpi manera nabaha.

20Bientu friu di nort ta supla

i fris awa hasi eis.

E ta traha un kaska riba tur superfisie di awa

i veivernan ta bisti harnas.

21Un bientu kayente ta kima serunan i tosta sabana,

manera kandela e ta kima e yerba fresku.

22Pero pronto tur kos ta kura dor di nubia húmedo,

e ora ei serena ta kai i duna alivio despues di kalor.

23Tabata su plan ku laman profundo a kalma

i a planta e islanan aden.

24Nabegante ta konta di e peligernan,

nos no por kaba di kere nos orea:

25aya tin kriatura straño, maravioso,

tur sorto di bestia i mònster.

26Danki Dios tur kos ta kaba bon

i tur kos ta bolbe sigui palabra di Dios.

27Maske kuantu nos papia, palabra ta poko.

Konklushon di nos palabranan ta: E ta Tur Kos.

28Unda nos ta haña forsa pa glorifik'É?

Pasobra E ta mas grandi ku tur su obranan.

29Señor ta temibel i mashá grandi

i su poder ta imponente.

30Glorifiká Señor i als'É ku tur boso forsa

pasobra semper E ta surpasá boso alabansa.

Hasi tur esfuerso ora boso ta alab'É,

no kansa, pasobra nunka boso no ta kaba.

31Ken a mir'É i ta deskribiÉ?

Ken por pint'É grandi manera E ta?

32Tin hopi kos skondí mas grandi di loke nos sa:

di su obranan nos ta weta mashá poko.

33— Ta tur e kosnan ei Señor a krea

i a duna debotonan sabiduria.