Salmo 58 - Papiamentu Bible with DC 2013(PBDC13)

SALMO 58Kontra hues- i mandatarionan koruptoPa maestro di kanto. Na weis di ‘No destruí’. Di David. Ku stèm mediano.

1Ta bèrdat, o shonnan dibino,

boso ta dikta sentensia hustu,

ta husga yunan di hende rektamente?

2Nò! Paden boso ta pensa solamente

riba e krímennan ku boso por hasi,

kalkulando ki sorto di violensia

boso man por kometé den e pais.

3E malbadonan ya tabata infiel

fo'i den barika di nan mama;

for di barika di nan mama

nan ta dualu, e sakadónan di mentira.

4Nan venenu ta manera di kolebra,

víbora surdu ku ta tapa su orea

5pa e no tende bos di enkantador,

dje kurioso di mas profeshonal.

6O Dios, kibra nan djente den nan boka,

garna kachete di e leonnan, SEÑOR!

7Laga nan dirti kore bai manera awa,

marchitá manera yerba trapá;

8mare nan bira manera slak,

ku kanando ta bira pèchèpèchè;

manera un yu k'a nase morto

i ku nunka no ta mira lus di solo.

9Promé ku bo weanan sinti

kalor dje kandela di palu

— sea ku e ta bèrdè o seku —

ya E ta ranka nan bai kuné.

10Esun ku a keda fiel lo gosa,

ora e mira e vengansa

i trapa den sanger dje malbadonan.

11Anto e ora ei hendenan lo bisa:

‘Pa hende fiel tòg tin rekompensa.

Bèrdat, Dios ta eksistí!

T'É ta hasi hustisia riba mundu.’