1 Makabeonan 8 - Papiamentu Bible with DC 2013(PBDC13)

HUDAS TA BUSKA E ROMANONAN KOMO ALIADOFama di e romanonan

1Hudas awor a tende di fama di e romanonan, esta ku nan tabata poderoso, pero tambe bon pa esnan ku aserká nan i ku nan tabata sera amistat ku tur ku tabata dirigí nan mes na nan.

2Prueba di nan poder tabata e historianan ku Hudas a tende di nan gueranan i hazañanan kontra e keltanan di parti nort di Italia; kon nan a derotá nan i pone nan paga belasting.

3El a tende tur loke nan a hasi na Spaña pa poderá di e minanan di oro i plata di e pais ei.

4Kon apesar di e distansia grandi, nan a poderá di henter e region dor di nan strategia i perseveransia. Tambe el a tende di reinan ku for di ekstremo di mundu a sali pa bringa kontra nan. E romanonan a derotá e reinan akí i pone nan sufri pèrdidanan grandi, miéntras esnan ku a sobrebibí mester a paga nan belasting tur aña.

5Nan a derotá i someté Filipo i Perseus, rei di Masedonia, i otronan ku a resistí nan.

6Asta nan a derotá Antíoko Magno, rei di Asia, ku a sali pa bringa kontra nan ku 120 olefante, sòldánan di kabayeria, garoshinan di guera i hopi sòldá di infanteria.

7E romanonan a koh'é prezu, nan no a mat'é i a obligá e i su susesornan paga un belasting altu. E mester a entregá rehen i algun di su mihó provinsianan:

8es desir India, Media i Lidia. Despues e romanonan a entregá rei Eumenes e regionnan ei.

9Tambe Hudas a tende e historia ku e hendenan di Gresia a traha un kòmplòt kontra e romanonan pa mata nan.

10Ora e romanonan a haña sa, nan a manda ún general so pa bringa kontra nan. Hopi griego a muri, e romanonan a kohe nan kasá i yu prezu i a bai ku nan, sakia nan propiedat, tuma nan pais pa nan, destruí nan fòrtinan i hasi e pueblo katibu. Nan a keda katibu te dia djawe.

11E romanonan a destruí i someté e otro reinonan i islanan tambe ku a yega di resistí nan, pero ku nan amigunan òf ku e hendenan ku tabata stèns riba nan, nan a mantené amistat.

12Nan tabatin reinan di paisnan serka i di paisnan leu den nan poder; si menshoná nan nòmber so, ya hende tabata haña miedu.

13Esnan ku nan tabata ke yuda bira rei, tabata bira rei, pero ora nan tabata ke nan tabata baha reinan tambe.

14Ounke nan a bira mashá poderoso tòg niun no a pone korona riba su kabes òf bisti mantel püs pa haña mas prestigio.

15Nan a traha un edifisio kaminda tur dia 320 miembro di konseho nashonal tabata reuní pa mira kon por oumentá bienestar di e pueblo.

16Kada aña nan tabata konfia gobernashon di henter nan pais na un solo hòmber, ku tur tabata obedesé, sin envidia ni kudishi.

Kombenio di amistat ku Roma

17Hudas a skohe Eupolemo, yu di Huan i ñetu di Ako, i Yason, yu di Eleazar, i el a manda nan Roma pa sera un kombenio di amistat,

18p'asina e romanonan libra e pueblo di e yugo di tirania, pasobra e israelitanan a ripará ku e dominio griego tabatin nan den un sklabitut kompleto.

19Nan a bai Roma; e biahe a dura mashá largu. Na Roma nan a drenta senado i bisa:

20‘Hudas Makabeo, su ruman hòmbernan i e pueblo hudiu a manda nos serka boso pa sera un kombenio di asistensia mutuo i pa boso inskribí nos komo boso aliado i amigu.’

21E romanonan a aseptá e proposishon akí.

22Esaki ta kopia di e karta ku nan a graba den plachinan di bròns i manda Herusalèm komo rekordatorio di e kombenio pa asistensia mutuo:

23‘Na romanonan i na pueblo hudiu, na tera òf riba laman, tur kos bon pa eternidat. Mare spada i enemigu por keda leu for di nan!

24Si Roma òf un di su aliadonan, unda ku nan tin poder, haña nan den guera promé,

25e ora ei e pueblo hudiu lo bringa di henter nan kurason na banda di Roma si sirkunstansianan eksigí esei di nan.

26Hudiunan lo no entregá trigo, ni arma, ni plaka, ni barku na e kontrapartido, ni pone e artíkulonan akí na nan disposishon. Asina Roma a disidí. Nan lo kumpli ku nan debernan, sin ningun engaño.

27E romanonan di nan parti lo bringa di henter nan kurason na banda di e hudiunan, si esakinan haña nan den guera promé i si sirkunstansianan ta eksigí esei.

28E romanonan lo no entregá trigo, arma, plaka òf barku na e agresor. Asina Roma a disidí. Lo e kumpli ku e debernan akí sin ningun engaño.

29Ku e palabranan akí e romanonan a sera un kombenio ku e pueblo hudiu.

30Si den futuro un di e partidonan ke agregá òf kita algu, e ora ei loke a agregá òf kita lo ta bálido si tur dos partido a bai di akuerdo.

31Nos a skibi rei Demetrio lo siguiente pa motibu di e daño ku e ta hasi hudiunan: “Pakiko bo ta pone un yugo pisá asina riba e hudiunan, nos amigu- i aliadonan?

32Si nos haña keho di nan kontra bo atrobe, nos lo duna nan hustisia i bringa bo na tera i riba laman.” ’