1Manera un biná ta anhelá
koriente di awa,
asina mi alma ta anhelá Bo,
Abo, mi Dios!
2Mi alma tin set di Dios,
di Dios bibu.
Ki dia mi por bai i lo mi mira
kara di Dios?
3Mi lágrimanan so ta mi kuminda
di dia i anochi,
miéntras nan ta puntra henter dia:
‘Unda bo Dios ta?’
4Awa ta yena mi wowo
ora mi kòrda
kon mi tabata kana dilanti
bayendo kas di Dios
ku gritu di alegria i alabansa,
e muchedumbre tur di fiesta.
5Mi alma, di kon bo ta flihí
i bo ta keha den mi?
Konfia den Dios! Lo mi bolbe alab'É,
mi Salbador i mi Dios!
6Mi alma den mi ta tumbá,
p'esei mi ta kòrda Bo
fo'i den tera di Yordan i Seru di Hermon
i for di Seru Abou.
7Wow'i awa un ta grita otro,
borotando den barika di baranka.
Bo remolinonan di awa i ola
a pasa riba mi.
8Den dia Dios ta mustra su amor,
anochi mi kanto ta p'E,
ún alabansa na e Dios di mi bida.
9Mi ta bisa Dios: ‘Mi Baranka,
di kon B'a lubidá mi?
Di kon mi ta kana tur tristu,
hostigá pa mi enemigu?’
10Ku gritu ku ta garna mi wesunan
enemigu ta ultrahá mi,
miéntras nan ta puntra henter dia:
‘Unda bo Dios ta?’
11Mi alma, di kon bo ta flihí,
i bo ta keha den mi?
Konfia den Dios! Lo mi bolbe alab'É,
mi Salbador i mi Dios!
Who We AreWhat We EelieveWhat We Do
2025 by iamachristian.org,Inc All rights reserved.
