Salmo 8 - Papiamentu Bible with DC 2013(PBDC13)

SALMO 8Dios ta koroná hende ku gloria i honorPa maestro di kanto. Na weis di Gat. Salmo di David.

1O SEÑOR, nos Dios,

esta glorioso bo nòmber ta

den mundu henter!

Sí, bo splendor ta alsá

te riba shelu!

2Pa boka di mucha i yu na lechi

Bo ta lanta bo poder,

pa bo atversarionan sa,

pa enemigu i rebelde keda ketu.

3Mirando bo shelu, trabou di bo dedenan,

luna i streanan ku Bo a fiha ayá,

4kiko hende ta pa Bo kòrda riba dje,

yu di hende pa Bo sinti p'e?

5Bo a hasié poko ménos ku un dios,

Bo a koron'é ku gloria i honor;

6Bo a pon'é manda riba obra di bo man,

tur kos Bo a buta bou 'i su pia:

7bestia chikí i baka, tur huntu,

i tambe bestia di mondi,

8para di shelu, piská den laman,

loke ta krusa kaminda di awa.

9O SEÑOR, nos Dios,

esta glorioso bo nòmber ta

den mundu henter!