Ester 2 - Papiamentu Bible with DC 2013(PBDC13)

Ester ta bira reina

1Despues di algun tempu, ora rei Xèrxès su rabia a baha, el a bolbe pensa riba Washti, riba loke Washti a hasi i kua desishon a tuma kontra dje.

2-3E ora ei funshonarionan na korte real a bis'é: ‘Rei mester nombra komisario den tur provinsia di su reino pa nan buska señorita yòn i bunita p'e. E hendenan ku rei nombra mester trese e señoritanan yòn i bunita akí na fòrti Susan i hiba nan na e kas kaminda rei su harem ta keda bou di kuido di Hegai, e eunuko di rei, ku ta enkargá ku e muhénan. Ei nan mester haña un tratamentu di beyesa.

4Esun ku rei haña mas bunita ta bira reina na lugá di Washti.’ Rei a gusta e idea i a aktua manera nan a proponé.

5-6Na fòrti Susan tabatin un hòmber hudiu ku yama Mordekai, for di tribu di Benhamin. Dor di su antepasadonan Yair i Shimi e tabata desendiente di Kish. E tabata un di e hendenan ku rei Nebukadnèsar di Bábel a deportá for di Herusalèm, huntu ku Yekonías, rei di Huda.