Tobit 10 - Papiamentu Bible with DC 2013(PBDC13)

Loke a sosodé mientrastantu na Nínive

1Mientrastantu Tobit tabata konta e dianan ku a pasa un pa un, esta tantu dia pa bai, tantu pa bini bèk. Ora e tempu ku e biahe mester a dura a pasa i su yu no a bini bèk ainda,

2el a pensa: ‘Algu por a pon'é tarda aya! Podisé Gabaèl a muri i no tin ningun hende pa entregá mi yu e plaka.’

3E tabata mashá tristu.

4Su kasá Ana a bis'é: ‘Sigur un desgrasia a pasa mi yu, e no ta na bida mas.’ I el a kuminsá yora i lamentá morto di su yu, bisando:

5‘Ta mi falta! Kon mi por a laga bo bai, abo ku ta mi pret'i wowo?’

6Tobit a bis'é: ‘Stòp di yora, no preokupá bo, mi dushi! Nos yu ta bon. Sigur nan lo a haña nan ku kontratempu, pero e hòmber ku ta kompañ'é ta konfiabel i ademas e ta nos kompatriota. No preokupá p'e, mi dushi. E ta yega aki ratu.’

7Pero Ana a kontest'é: ‘Keda ketu, no tuma mi hasi kèns. Mi yu a muri.’ Tur dia e tabata lanta i para mira e kaminda ku e yu a pasa dia el a bai biaha. E no tabata hasi kaso di niun hende. Ora solo baha, e tabata drenta kas i tabata yora henter anochi sin por a drumi.

Salida for di Ekbátana

8Mientrastantu e dos simannan di fiesta di kasamentu a pasa, e temporada ku Raguel a pone komo kondishon na honor di su yu. E ora ei Tobias a bai serka Raguel i bis'é: ‘Laga mi bai, pasobra mi tin sigur ku mi mama i tata ya a pèrdè speransa di mira mi bèk. Tata, por fabor, laga mi bai kas di mi tata awor. Ya mi a konta bo den ki situashon mi a laga nan.’

9Raguel a kontest'é: ‘Keda, mi yu, keda serka mi. Lo mi manda algun mensahero serka bo tata Tobit pa nan hiba notisia di bo p'e.’ Sinembargo Tobias a persistí: ‘Nò, mi ta pidi bo laga mi bai serka mi tata bèk.’

10E ora ei Raguel a entreg'é su kasá Sara i mitar di tur loke e tabatin: sirbidó, kriá, bue, karné, buriku i kamel, paña, plata i kos di uso.

11Despues el a laga nan bai trankil. El a despedí di Tobias i bis'é: ‘Mi ta deseá bo tur kos bon, mi yu! Bai na pas! Dios di shelu duna boso un bon biahe, abo i Sara bo kasá. Ohalá mi por mira boso yunan promé mi muri!’

12I el a bisa su yu Sara: ‘Bai kas di bo suegu na pas. Djawe padilanti nan lo ta bo mayornan, meskos ku nos ku a duna bo bida. Bai na pas, mi yu, i ohalá ta bon notisia so mi tende di bo miéntras mi ta na bida.’ I el a tuma despedida di nan i laga nan bai.

13E ora ei Edna a bisa Tobias: ‘Mi subrina stimá, Dios di shelu duna bo bon ora di kaminda. Mare mi por mira yunan di bo i di mi yu Sara promé mi muri. Dilanti di SEÑOR mi ta konfia mi yu muhé den bo man, no dun'é fèrdrit nunka di bo bida. Ayó, mi yu, djawe padilanti mi ta bo mama i Sara ta bo kasá stimá. Ku nos tur biba mes felis tur dia di nos bida.’ Despues el a sunchi nan tur dos i a laga nan bai na pas.

14Tobias a bai felis i satisfecho for di kas di Raguel, miéntras e tabata alabá SEÑOR di shelu i di tera, rei di universo, ku a hasi su biahe eksitoso. Raguel a bis'é: ‘Mare bo tin e felisidat di honra bo mayornan tur dia di nan bida.’