Isaías 4 - Papiamentu Bible with DC 2013(PBDC13)

1E tempu ei shete muhé lo dal man tene ún solo hòmber

i bis'é:

‘Nos mes ta sòru pa nos pan,

nos mes ta perkurá pa nos ko'i bisti,

kontal ku bo duna nos bo nòmber

i asina kita nos bèrgwensa.’

Promesa pa un futuro felis

2Pero lo yega un dia

ku loke SEÑOR laga spreit di nobo

lo ta bunita i glorioso.

I tur esnan na bida ainda na Israel

lo ta orguyoso di kosechanan di tera

i nan lo gosa di nan.

3Anto esnan ku a keda na bida na Sion,

esnan ku a sobrebibí na Herusalèm,

esta tur ku a keda registrá pa biba aya,

lo ta yamá ‘konsagrá na SEÑOR’.

4Señor lo laga un bientu di hustisia i purifikashon supla

pa laba sushedat for di e muhénan di Sion

i limpia sanger di krímennan for di Herusalèm.

5E ora ei

SEÑOR lo krea riba henter e santuario di seru di Sion

i riba esnan ku ta reuní aya

un nubia di huma den dia

i splendor di kandela anochi.

Altu riba tur gloria di e pais

SEÑOR lo ta manera un baldakin,

6un ramada pa duna sombra kontra kalor den dia

i pa sirbi komo un lugá di skonde i duna protekshon

den mal tempu i áwaseru.