Salmo 102 - Papiamentu Bible with DC 2013(PBDC13)

SALMO 102Mi Dios, no laga mi bai awor ku mitar so di mi bida a pasaOrashon di un hende flihí, ora e ta serka di pèrdè speransa i ta deshogá su kurason dilanti di Dios.

1SEÑOR, skucha mi orashon,

laga mi gritu yega serka Bo.

2No skonde bo Kara pa mi,

awor, na mi ora di mester.

Paga atenshon na mi,

mi ta yama: rospondé mi lihé!

3Pasobra mi dianan ta kaba na huma,

mi wesunan ta kima manera un fogon.

4Mi kurason parse yerba, seku, marchitá,

mi ta asta lubidá di kome pan.

5Komo mi ta keha asina duru,

mi kueru a kohe mi wesunan.

6Mi parse un para di mondi,

un palabrua ku ta biba den ruinanan.

7Mi n' ta pega soño, mi ta keha,

manera un para ku ta so riba dak.

8Mi enemigunan ta pil di mi sin fin,

nan ta zundra mi i ta plega mi nòmber.

9En bes di pan mi ta kome shinishi,

mi bibida ta mesklá ku aw'i wowo,

10pa motibu di bo rabia i bo furia:

Bo a hisa mi benta mi afó.

11Mi dianan ta bai manera sombra di atardi,

mi mes ta para seka meskos ku yerba.

12Sinembargo, SEÑOR, bo trono t'ei pa semper,

generashonnan tras di otro lo menta bo nòmber.

13Sí, lo Bo lanta i sinti duele di Sion,

pasobra e ora pa Bo tene piedat di dje,

e ora stipulá, a yega!

14Bo sirbidónan, ai, ta stima su piedranan,

ku duele nan ta mira su ruina.

15Nashonnan lo honra bo nòmber, SEÑOR,

tur rei di mundu bo gloria,

16ora SEÑOR bolbe lanta Sion

i ora E aparesé den su gloria,

17ora E skucha orashon di hende sin amparo

i no despresiá nan pidimentu.

18Mester skibi esaki pa esnan ku t'ei mañan,

pa e pueblo, ku e ora ei ta kreá,

kanta alabansa di SEÑOR:

19SEÑOR a mira abou fo'i su lugá den altura,

El a mira for di shelu riba tera,

20pa E tende kehamentu di hende na kadena,

pa libra hende destiná pa muri;

21pa nan proklamá SEÑOR su nòmber na Sion

i kanta su alabansa na Herusalèm,

22ora pueblonan i reinonan lo basha bini huntu

pa ofresé nan sirbishi na SEÑOR.

23El a kibra mi forsa na kaminda,

El a hasi mi bida mas kòrtiku.

24Mi di: ‘Mi Dios, no laga mi bai

awor ku mitar so di mi bida a pasa;

bo añanan ta dura mashá siglo!’

25Bo a funda mundu den prinsipio,

shelu ta obra di bo man.

26Nan lo peresé, ma Bo ta keda,

tur lo gasta manera un bistí.

Bo ta kambia nan manera paña bieu,

nan ta bira kos di buta un banda.

27Ma Abo ta keda semper meskos,

lo no tin fin na bo añanan.

28Nos yunan, bo sirbidónan, lo biba fo'i peliger

i nan yunan lo no kita mas fo'i bo presensia.