1Alabá sea SEÑOR!
Esta bon di kanta himno na nos Dios,
sí, ta dushi, alabansa mester zona!
2SEÑOR ta bolbe konstruí Herusalèm,
ta trese huntu desteradonan di Israel.
3E ta kura esnan kibrá di kurason,
e ta mara tur nan heridanan.
4El a fiha e number di streanan,
E ta yama kada un na su nòmber.
5Nos SEÑOR ta grandi, poderoso,
su sabiduria ta sin límite.
6SEÑOR ta sostené humildenan,
ta humiliá pekadónan te na tera.
7Entoná alabansa pa SEÑOR,
toka salmo riba arpa pa nos Dios:
8E ta tapa shelu ku su nubianan,
ta hasi awa kai riba tera
ta laga yerba sali riba serunan,
matanan pa tur mester di hende.
9E ta duna kuminda na bestianan
i na yu 'i paranan ora nan ta grita.
10E n' tin kunes ku brio di kabai,
ni ku pia robusto di hòmber.
11E ta gusta esnan ku respet'É
i ku ta anhelá su fabornan.
12Kanta gloria di SEÑOR, Herusalèm,
Sion, alabá bo Dios!
13El a pone tranka fuerte na bo portanan,
a bendishoná bo yunan denter di bo,
14a trese pas den henter bo teritorio
i ta kria bo ku manteka di trigo.
15E ta manda su òrdu pa mundu,
— kon lihé su palabra ta kore!
16E ta manda sneu manera lana,
ta stroi puiru di eis manera stòf,
17ta tira eis na pipitanan grandi.
Ken por wanta su frialdat?
18Ún palabra i tur kos ta dirti,
k'E manda bientu tur awa ta kore.
19El a revelá su palabra na Yakob
su presepto i leinan na Israel.
20Ningun pueblo E no a trata asina,
nan no konosé su leinan.
Alabá sea SEÑOR!
Who We AreWhat We EelieveWhat We Do
2025 by iamachristian.org,Inc All rights reserved.
