Levítiko 1 - Papiamentu Bible with DC 2013(PBDC13)

Ritonan di e diferente sakrifisionanSakrifisio di kandela

1SEÑOR a yama Moises serka djE; for di tènt di enkuentro El a dun'é instrukshon kon ta ofresé sakrifisio. El a orden'é pa

2bisa e israelitanan lo siguiente: ‘Ora un di boso ke ofresé un bestia komo sakrifisio na SEÑOR, e por skohe entre su toronan i bakanan òf entre su karnénan i kabritunan.

3Si e ke ofresé un sakrifisio di kandela for di su bestianan di kria grandi, e mester skohe un bestia machu, sin niun defekto.Levítiko 22:18-20 E mester hiba e bestia na entrada di tènt di enkuentro, pa asina logra haña grasia di SEÑOR.

4E persona ta pone man riba kabes di e bestia; asina SEÑOR ta aseptá su ofrenda i pordon'é su pikánan.

5Despues e ta mata e toro dilanti di santuario, i e saserdotenan, yunan di Aaron, ta presentá e sanger na SEÑOR, kaba sprengu e kontra tur banda di e altá ku tin na entrada di tènt di enkuentro.

6Despues di esei e persona ta soya e bestia i kòrt'é na pida pida.

7E saserdotenan ta pega kandela riba e altá i ta drecha e palunan bon riba dje.

8Despues nan ta drecha e pida karninan, e kabes i e sebu riba e palunan ei.

9Kaba e persona ku ta hasi e ofrenda ta laba e mondongo i e patanan di e bestia ku awa i un saserdote ta kima tur loke tin riba altá. Asina e ofrenda ta un sakrifisio di kandela, ku un holó agradabel pa SEÑOR.

10Si e ke ofresé un sakrifisio di kandela for di su karnénan i kabritunan, e mester skohe un bestia machu, sin niun defekto.

11E ta mata e bestia dilanti di santuario na e banda nort di altá; e saserdotenan, yunan di Aaron, ta sprengu e sanger kontra tur banda di e altá.

12E persona ta kòrta e bestia na pida pida, i e saserdote ta pone e pidanan ku e kabes i e sebu riba e palunan ku tin riba e kandela di altá.

13Despues e persona ta laba e mondongo i e patanan ku awa. E saserdote ta presentá nan na SEÑOR i kima tur e kosnan ei riba altá. Asina e ofrenda ta un sakrifisio di kandela, un sakrifisio di kuminda, ku un holó agradabel pa SEÑOR.

14Si un persona ke ofresé SEÑOR un para komo sakrifisio di kandela, e mester kohe un tòrteldùif òf un pichon.

15E saserdote ta bai altá ku e para, trose kabes di e para kita afó i kima e kabes riba altá. E ta laga sanger di e para lèk na banda di e altá.

16E ta saka e para su bus ku tur loke tin aden i benta esaki kaminda ta tira shinishi na banda ost di e altá.

17E ta sker e para su alanan sin kita nan afó, i kima e para riba altá, riba e palunan ku tin riba e kandela. Asina e ta un sakrifisio di kandela, un sakrifisio di kuminda, ku un holó agradabel pa SEÑOR.