Sirag 30 - Papiamentu Bible with DC 2013(PBDC13)

Edukashon

1Es ku ta stima su yu no ta keda sin sut'é

i despues di tempu e yu lo ta su alegria.

2Es ku eduká su yu lo gosa di dje

i dilanti di su konosínan lo e ta orguyoso di dje.

3Es ku instruí su yu ta hasi su enemigu yalurs

i dilanti di su amigunan lo e ta kontentu kuné.

4Si e tata muri, ta komo si fuera e no a muri,

pasobra e ta laga un meskos kuné atras.

5Tanten e ta na bida e ta felis ku su yu

i dia e muri e no ta tristu.

6Pa su enemigunan e ta laga un vengadó atras,

pa su amigunan un hende ku ta demostrá gratitut.

7Es ku mima su yu, mester pone pleistu riba tur herida chikí;

e yu n' grita ku e ta tembla di miedu.

8Si bo no doma un kabai e ta bira tèrko,

i si bo laga un mucha hasi su kièr, kos ta sali for di man.

9Mima un mucha i bo ta haña bo ku sorpresanan penoso,

hasi ko'i loko kuné i bo ta haña bo ta yora un dia.

10No hari samsam kuné pa bo no sufri samsam kuné

i na fin di kuenta morde djente di duele.

11No laga e hasi loke e ke den su hubentut

12Sut'é riba su atras tanten e ta chikitu ainda,

sino e ta bira tèrko i no ta obedesé bo mas.

13Eduká bo yu i pon'é traha

pa e no pone bo kara na bèrgwensa.

Salú i felisidat

14Mihó un pober, ku ta salú i tin un kurpa fuerte,

ku un riku tur krekeché.

15Salú i bon kondishon ta bal mas ku tur oro,

un kurpa fuerte ta mihó ku tur rikesa.

16No tin rikesa mas grandi ku salú

ni alegria mas grandi ku felisidat.

17Mihó muri ku biba un bida infelis,

mihó sosiegu eterno ku sufrimentu sin fin.

18Kiko bal e kuminda di mas dushi,

si bo ta dje malu ei ku ni habri bo no por habri bo boka?

Tantu bal pon'é riba un graf!

19Kiko un sakrifisio di kuminda ta bal pa un ídolo?

Tòg e no por hol'é ni kom'é.

Asina ta pasa ku hende ku Señor a manda malesa p'e:

20e ta weta e kuminda su dilanti i ta suspirá

manera un eunuko ku ta brasa un mucha muhé.

21No laga tristesa dominá bo

ni bo pensamentunan tormentá bo.

22Alegria ta duna hende bida,

kurason kontentu ta alargá bida.

23Buska distraishon, biba bo fe

i kore ku tristesa mand'é leu,

pasobra tristesa a kaba ku hopi hende,

bo no ta gana nada nada kuné.

24Yalurs i rabia ta hasi bida mas kòrtiku

i preokupashon ta hasi hende bieu promé ku su ora.

25Un hende ku ta sinta alegre i kontentu na mesa

tin bon probecho di su kuminda.