Job 39 - Papiamentu Bible with DC 2013(PBDC13)

1Bo sa ki ora kabritu di mondi ta wèrp?

Bo t'ei pará ora biná pari su yu?

2Bo sa kuantu luna nan ta keda dek?

Bo sa ki ora ta nan ora?

3E binánan muhé ta sak abou

pa pone nan yu riba suela.

4E yunan ta krese, bira fuerte,

sali bai, drenta kunuku,

sin bolbe mas serka nan mama.

5Ken a duna burik'i mondi libertat,

di manera ku nan por kore rònt pa nan kuenta?

6Mi a duna nan un lugá,

kaminda hende no ta biba ni labra tera

i kaminda yerba no ta krese.

7Nan ta keda leu for di siudatnan lawai

i niun hende no por mansa nan

ni pone nan traha.

8Nan ta rekoré seru buskando yerba,

kualke yerba bèrdè pa nan kome.

9Bo ta kere ku toro salbahe ke sirbi bo

i pasa nochi den bo stal?

10Bo por mara kabuya na su garganta

lag'é hala karga,

o pon'é lastra un balki pa paria bo tera?

11Pasobra e tin asina tantu forsa

bo por konfi'é pa hasi bo trabounan pa bo?

12Bo por konta ku e ta bini bèk fo'i kunuku

i trese bo kosecha riba bo plench'i bati trigo?

Preguntanan tokante abestrus, kabai i para di rapiña

13Ounke alanan di abestrus ta bati kontentu,

bo no por kompará nan ku alanan di óyevar,

ku sí por bula.

14E abestrus ta pone su webunan riba suela

i ta laga nan keinta den santu,

15sin sa ku un pata por machiká nan,

ku kualke animal salbahe por plèchè nan.

16E ta mama kurason duru pa su yunan;

e ta trata nan manera yu straño

i no ta import'é

ku el a pone webu por nada,

17pasobra Dios a lubidá riba dje

na momento di duna sabiduria

i no a dun'é niun tiki komprondementu.

18Pero e tin mas liheresa

ku kabai i ginete pareu;

e ta bula lanta, saka kareda

i hari nan.

19Bo ta duna kabai su forsa

o dòrna su nèk ku un klina,

ku ta basha riba su lomba?

20Bo ta lag'é salta manera dalakochi,

miéntras e ta supla i snùif

na un manera spantoso?

21E ta sapatiá ku furia,

gosando su forsa;

e ta ranka drenta bataya

kontra armanan di enemigu.

22E ta pil di miedu,

e no konosé temor,

e no sa retirá,

23maske kokernan di flecha ta borotá

den su orea

i lansa i sabla ta lombra den solo.

24Temblando di eksitashon e kabai ta ranka sali;

ora tròmpèt zona e no por para ketu.

25Kada be ku e tende e zonido ei

e ta grita,

djaleu e ta hole e bataya

i ta tende e komando,

gritá p'e kabesantenan.

26Ora un para di rapiña habri su ala,

pa bula bai zùit,

t'abo a siñ'é bula?

27Ta riba bo komando águila ta subi bai laria

i traha su nèshi te arib'ayá?

28E ta akomodá su mes den e barankanan

i aya e ta drumi riba punta di su fòrti.

29Fo'i djei e ta wak si tin kuminda,

e ta peilu un distansia leu.

30Kaminda tin kadaver,

ei warawara ta reuní,

su yunan ta bebe e sanger.’